Desa Simpen Kaler, Limbangan Garut, rek Ngadegkeun Koperasi

Kantor Desa Simpen Kaler, Limbangan, Garut. | sundaonline.com

Desa Simpen Kaler, Kacamatan Balubur Limbangan, Kabupaten Garut, geus ngararancang rek ngadegkeun koperasi pikeun ngaronjatkeun  karaharjaan warga desa. "Ngayakeun koperasi teh kalintang pentingna, ngarah warga henteu kulayaban nginjeum duit ka mana wae," cek Kepala Desa Simpen Kaler, Ali Saefudin (45), basa ngawangkong jeung sundaonline.com, sawatara waktu kaliwat.

Ali Saefudin anu nyangking kalungguhan kades kadua kalina netelakeun, jumlah penduduk di Desa Simpen Kaler aya 1.987 KK, pakasaban sapopoena lolobana patani jagong jeung sampeu.

 "Alhamdulilah abdi masih keneh dipercanten ku warga masyarakat nyangking kalungguhan kades. Pikeun abdi mah ieu kapercantenan teh mangrupi tangtangan anu langkung abot. Tapi sanaos kitu, mugia pangwangunan nu masih katunda tiasa direngsekeun," pokna deui.

Salila jadi kades dina periode munggaran, Ali Saefudin geus bisa ngawangun kantor desa jeung ngahotmik sababaraha kilo meter jalan desa. Tinggal jalan Cicaban nu ngahubungkeun Kampung Cipari jeung Pangeureunan encan kagarap. Pangna leuwih ngaheulakeun jalan teh, ceuk Kades Ali, alatan jalan kacida pentingna pikeun kalancaran usaha masarakat widang tatanen. Tumali jeung eta hal, Kades Ali umajak ka sakumna warga Desa Simpen kaler pikeun babarengan ngawangun desa. Ka hareup kudu jadi desa unggulan.

"Katiten ku sim kuring oge, Kades Ali mah ka bawahanana kaasup bageur, tara huak-haok nyarekan teu pupuguh, tapi teu weleh nerapkeun disiplin," ceuk Anang Engkoy, inohong masarakat Cijinten, Desa Simpen Kaler. [] Ida Rukmana