Di Radio Fajri 1458 AM, Diajar Islam Jadi Leuwih Gampang

Nyaritakeun sajarahna Radio Fajri 1458 AM anu pernahna di wewengkon Kacamatan Cangkuang, Kabupaten Bandung, moal bisa dileupaskeun ti Radio Sangkuriang. Ari Radio Sangkuriang teh radio di Kota Bandung anu kasohor di jamanna ku sabab boga juru dongeng kameumeut balarea, nya eta Rahmat Dipraja. Tetela, sanggeusna dicukcruk mah, Radio Sangkuriang teh jadi kasangtukangna Radio Fajri anu kiwari kakoncara jadi radio islami, alatan acarana leuwih museur kana syi'ar jeung da'wah Islam.

Radio Fajri Bandung minangka cabangna Radio Fajri Bogor, nu kiwari dipupuhuan ku Ustadz Miftah Wangsadanureja, MPdI. "Alhamdulilah tos aya opat taunna abdi dipercanten ngokolakeun Radio Fajri Bandung. Samemehna abdi kantos janten penyiar Radio Fajri Bogor," ceuk Ustadz Miftah ka sundaonline.com sawatara waktu kaliwat."Ku ayana Radio Fajri, diajar Islam janten langkung gampil," eta alumni Pasantren Gontor anu kawentar penulis buku "Agar Terhindar dari Sihir", tur kungsi jadi wartawan di salah sahiji koran di Bandung teh, netelakeun.

Kiwari jumlah mitra danguna Radio Fajri leuwih ti 3.000 urang. Lian ti patarema rasa di jomantara, Radio Fajri sok ngayakeun acara kajian Islam sarta tepung lawung penggemar sacara off air. Tanggal 20 Desember nu kaliwat oge ngayakeun eta acara di wewengkon kompleks Burangrang. Dina eta acara Ustadz Miftah medar tema "Antarkan Aku ke Surga-Nya".

"Sajabi ti  ngayakeun pangaosan di masjid (Kompleks Burangrang), Radio Fajri oge nyobian ngayakeun acara pangaosan di luar masjid anu di sakurilingna pinuh ku tatangkalan, sasaungan, balong, anu dipapaesan ku cur-corna cai," ceuk Ustadz Dian Farid, Manager Marketing Radio Fajri. 

Pikeun ngantengkeun tali silaturahim antara mitra dangu jeung ais pangampih Radio Fajri, insya Alloh bakal diayakeun Forum Komunikasi Pendengar Radio Fajri. Ieu forum dirarancang ka hareupna bakal ngabantu Radio Fajri dina rupaning kagiatan nu ngalibetkeun masarakat. Ku kituna, boh Ustadz Miftah boh Ustadz Dian Farid, miharep para mitra dangu ngarojong pikeun ngamasarakatkeun, sarta mekarkeun program alpukahna Radio Fajri, nya eta da'wah ahli sunnah waljama'ah. [] Ida Rukmana