KH Entis Maulana Sidiq Ngubaran Rupa-rupa Kasakit

KH Entis Maulana Sidiq alias Abah Entis.

Di kota Bandung, kitu deui di Kabupaten Bandung, ahli bekam jeung refleksi, nu mangrupa pengobatan alternatif, geus kaitung rea, renung, aya kana puluhna. Salah saurang di antarana nya eta KH Entis Maulana Sidiq ti Majelis Taklim Miftahul Jannah, Kampung Mulyasari (Cibisoro), Katapang, Kabupaten Bandung. 

KH Entis Maulana Sidiq sapopoena salian ti ngokolakeun majelis taklim teh, remen dipentaan tulung, boh ku ibu-ibu ti majelis taklim, boh ku masarakat sabudeureunana pikeun ngubaran rupa-rupa kasakit.

Samemeh dibekam, ku KH Entis Maulana Sidiq pasen teh diurut heula, disasar urat-urat sarapna, direfleksi. Sanggeus kitu kakara dibekam, eta teh minangka cara keur ngaluarkeun darah kotorna, cenah.

“Ngahaja darah kotorna dikaluarkeun heula, ku margi upami teu dikaluarkeun kasakitna moal damang-damang,” cek KH Entis Maulana Sidiq ngajentrekeun ka sundaonline.com, di kantorna, Salasa, 8 Desember 2015.

Lamun getih kotorna geus beak mah, masing dibekam ngaduakalian oge moal kaluar deui, sabab bakal eureun sorangan. Kitu deui getih segerna moal kaluar bareng jeung getih kotor. “Peso bedahna oge dijamin seteril. Upami parantos dianggo, teu kenging dianggo deui, tapi langsung dipiceun,” ceuk KH Entis Maulana Sidiq netelakeun.

Ku lantaran pasen nu tatamba loba nu cageur, nya pabeja-beja, nepi ka ahirna kasohor ka ditu ka dieu. Nu ngadon tatamba lain urang Katapang wungkul, tapi aya oge pasen ti Kota Bandung, Garut, Sumedang, Sukabumi, jeung daerah sejenna.

“Ngawitan muka pengobatan alternatip teh ti taun 1980,” ceuk KH Entis Maulana Sidiq anu sok dilandih Abah Entis.

Lian ti bekam jeung refleksi, KH Entis Maulana Sidiq, oge kawentar ahli ngubaran patah tulang. Kungsi aya pamuda urang Komplek Sukamenak Indah, Sayati, Kabupaten Bandung, anu pingping kenca jeung pingping katuhuna potong, ku alatan kacilakaan lalu-lintas di Jalan Aria Jipang Bandung. Kitu deui palebah bitis beulah katuhu ge potong, nepi ka teu bisa walakaya deui. Sapopoena teh ngajoprak wae dina kasur. Ku sabab kitu, eta pamuda kapaksa kudu cicing di Madrasah Miftahul Jannah nepi ka sabulanna, dibaturan ku dulurna, kalan-kalan ku indung bapana pili genti.

Samemeh dibawa ka Majelis Taklim Miftahul Jannah teh, eta pamuda kungsi dibawa heula ka rumah sakit Boromeus Bandung malah cenah kudu diamputasi sagala. Atuh manehna oge kudu nyadiakeun duit keur waragadna Rp 150 juta, bari taya jaminan bakal normal deui.

Ku sabab kitu indung bapana mawa eta pamuda ka ahli pengobatan alternatip, ka ahli patah tulang, nya harita teh dibawa ka KH Entis Maulana Sidiq.

Alhamdulillah, sabada diubaran ku KH Entis Maulana Sidiq, eta pamuda teh bisa diuk deui. Tulang sukuna nu tadina pasiksak, bisa normal deui.

KH Entis Maulana Sidiq ngajentrekeun, ayana kasakit dina jero awak urang teh, ku lantaran numpukna toksin atawa racun dina jero getih. Racun-racun teh asalna tina polusi udara, bahan pengawet kadaharan, pestisida nu napel kana sayur-sayuran, roko, alkohol, jeung ubar-ubar sejenna nu ngandung bahan kimia.

Numpukna toksin atawa racun dina getih teh, pokna deui, bakal ngabalukarkeun urang jadi males, nguyung, kurang sehat, babarian cape jeung tekanan darah babarian naek. Ditambah deui ku ayana angin nu hese dikaluarkeun, atuh jalma nu katerap ku kasakit teh bakal kaganggu emosi jeung jiwana.

Ku cara dibekam jeung refleksi, ceuk KH Entis Maulana Sidiq, kasiatna bisa ngabantu pikeun ngaluarkeun toksin atawa racun dina jero awak. Pikeun ngaleungitkeun rasa nyeri jeung mulangkeun fungsi organ awak, cindekna matak sehat.

Metodeu pengobatan kitu teh, pokna deui, geus kasohor ti baheula keneh, ti jaman Kangjeng Nabi Muhammad jumeneng. Dina basa Inggris, cara pengobatan kitu katelahna cupping, ari dina basa Arab disebutna al-hijamah. Mangpaatna bekam teh, nyaeta keur miceun getih nu ngandung toksin atawa racun kimia nu teu bisa diurai ku awak ngaliwatan pembuluh darah jeung organ awak sejenna. Maksudna mulangkeun deui sistim imunitas atawa kekebalan tubuh.

Saha wae jalmana nu kudu dibekam teh? Ceuk KH Entis Maulana Sidiq mah, kahiji para pelajar atawa mahasiswa pikeun ngabantu nyeukeutan uteukna. Kaduana jalma-jalma umumna nu sanajan geus sehat oge, tapi aya alusna upama dibekam, kasiatna pikeun ngajaga awak tetep sehat, ngarah henteu gampang keuna ku panyakit. Ari nu katiluna, nyaeta jalma nu memang keur nandangan kasakit saperti boga kasakit migren, hipertensi, asam urat, kolesterol, jantung, asup anging jeung sajabana. Aya tujuh puluh dua kasakit nu nyaliara dina awak urang, bisa dicageurkeun ku cara dibekam.

“Waragad di dieu mah, langkung mirah ti batan tatamba ka dokter,” KH Entis Maulana Sidiq.

Bisana KH Entis Maulana Sidiq ngubaran ku cara nabi teh, lain saukur meunang ngulit sorangan, tapi geus aya dadasar ti sepuhna, nyaeta ti Bapa Jaya Sasmita nu kasohor ahli pengobatan alternatip. Sanggeus tamat SD, KH Entis Maulana Sidiq diajar elmu pengobatan alternatip, hususna cara pengobatan nu dipraktekkeun jaman nabi, nepi ka maherna tur bisa macakal sorangan.

“Ti kawit SD oge, abdi mah sok ngingiring ka pun bapa, diajar pengobatan alternatip. Ngawitan taun 1980, nembe muka praktek pengobatan sorangan di Miftahul Jannah,” ceuk KH Entis Maulana Sidiq medarkeun pangalamanana.

Mimitina mah, biasa bae ngubaran kulawargana heula. Lamun kulawargana gering teh tara tatamba ka mana-mana, tapi sok dileukeunan ku sorangan. Sanggeusna bisa ngubaran kulawargana, kakara wani ngubaran tatangga nu dareukeut.

Nya meureun geus kitu tea, alatan nu tatamba ka KH Entis Maulana Sidiq dikersakeun loba nu calageur, ahirna mah pabeja-beja, nyebar ka mana-mana. Nepi ka kiwari teu bireuk deui, KH Entis Maulana Sidiq kasohor ahli pengobatan alternatip.

Pikeun ngubaran nu gering, KH Entis Maulana Sidiq ngabogaan asisten di antarana Hj Yani Suryani (istrina) jeung putra-putrana, Rita Karmila, Emi Hidayah, Siti Solihah, Dede Supriatna jeung Wawan Setiawan.

Lain saukur dibekam pikeun dikaluarkeun getih kotorna wungkul, tapi pasen nu tatamba ka KH Entis Maulana Sidiq teh sok dibere cai meunang ngadoa jeung madu asli. Malah sangkan pasen nu tatamba tea gancang cageur, osok ditambahan dibere ubar meunang ngaracik sorangan. Tarapti pisan ubarna oge dipelesan. Ubar tina herbal nu geus meunang ngaracik tur geus diasupkeun kana kapsul teh, di antarana bae kapsul sambiloto, pikeun ubar inpeksi saluran ampedu, radang ginjal akut, kencing manis jeung darah tinggi. Kapsul habbatus sauda 100% pikeun normalkeun tekanan darah, anti bakteri jeung virus sarta lemak, kotoran dina sarap uteuk jeung sakujur awak. Kitu deui kasiatna bisa nurunkeun beurat awak, nyageurkeun kasakit kolesterol, nurunkeun kadar gula, ngaleungitkeun asam urat, cape-cape, linu jeung ngalancarakeun buang air besar. [] Ida Rukmana/Endang GG