Kober Paud Madani Rancamanyar Didongdon ku Unicef

Kober Paud Madani Kampung Nusa Rancamanyar, Kabupaten Bandung, sakolana kaasup nyumput, aya di tengah kampung, tapi jumlah muridna aya 50 urang, rohangan diajarna masih di imah, boga lahan nu can dibangun, guruna opat urang.

Eta Paud teh geus ngadeg ti taun 2006. “Mung diresmikeunana ku dinas mah nembe sataun,” ceuk pengelola Paud Madani, Isah Kartisah, ka sundaonline.com, sawatara waktu kaliwat.

"Sanaos tos lami geuning kaayaanana masih kieu, rohangan diajar masih di rorompok. Kanggo kantor administrasi oge masih ngagunakeun rohangan tamu. Namung abdi katut para guru tetep sumanget," Ibu Isah ngageletis.

Dina kaayaan kitu Ibu Isah nyorang kabungah, sabab sawatara bulan kaliwat sakolana didongdon ku Unicef. “Sugan we lungsur bantosanana,” Ibu Isah kebek ku pangharepan. Lamun bantuan ti Unicef ngawujud, Ibu Isah rek ngawangun sakolana.

Ibu Isah teh lahir di Garut 40 taun ka tukang, bakat ngajarna ti keur rumaja keneh. Basa keur di SMA-na, Ibu Isah sakelas jeung artis anu kiwari jadi politisi, nya eta Oneng Diah Pitaloka."Mung dugi ka kiwari abdi tacan tepang deui sareng anjeunna teh. Ah,da tangtosna oge anjeunna mah sibuk,” ceuk Ibu Isah. “Ketang, da abdi oge sibuk ngokolakeun Paud nu alhamdulilah dipercanten ku masyarakat,"pokna deui.

Ngan nyakitu cenah murid-murid Kober Paud Madani mah lolobana ti nu jarauh, nu deukeut mah bisa diitung hiji-dua. Aya sababaraha urang muridna kabiruyungan juara MTQ jeung juara ngagambar.

Ditanya ku sundaonline.com ngeunaan honor guru Paud, Ibu Isah netelakeun yen honorna tacan nyugemakeun. “Namung, sanaos badarat, aranjeunna sarumanget angkat ka sakola teh," pokna. [] Ida Rukmana