Masih Aya Guru Paud nu Honorna Rp 150 Rebu Sabulan

Kober Paud Nur Istiqomah Rancamanyar, Kabupaten Bandung. 

Guru Paud tugas ngajarna teu sarua jeung guru PNS. Guru Kober Paud mah ngajar ka murid teh jiga bari ulin. Beda pisan jeung guru PNS. Angot dina sual gajihna. Tug ka kiwari matak pikawatireun. Da eta we masih aya guru Paud unggal bulanna nampa honor Rp 150 rebu. Jadi, kasawang unggal poe kudu ngatur kahirupanana ku ngajeujeuhkeun duit lima rebu perak, ari harga beas sakilona sapuluh rebu, acan deungeun sanguna. Sedengkeun guru PNS mah, salian ti gajih jutaan teh, meunang tunjangan itu-ieu. Jadi, status guruna mah sarua, ngan beda panghasilanana.

"Abdi ngokolakeun Kober Paud tos aya kana tilu taunna, jumlah murid mung ukur 15 urang, guru dua urang, leres pisan gajih guru paling ageung sasasihna saratus lima puluh rebu, aya kalana nombokan, da SPP ti murid teu lancar," ceuk hiji guru Kober Paud di Kacamatan Baleendah, Kabupaten Bandung.

Memang, aya sabagean Kober Paud nu geus meunang bantuaan ti pamarentah, oge bantuan ti donatur sejenna. Ku kituna, katingali ngajengleng wangunan sakola anu weweg, alat permainanana kumplit, jeung para guruna meunang tambahan gajih. Tapi kumaha Kober Paud nu can meunang bantuan? Da geuning aya selentingan sabagean nu meunang bantuan teh alatan aya kawawuhan urang jero. Jadi pikeun nu cicingeun mah tur teu boga urang jero ukur bisa ngegel curuk. Paling bingung mun pareng aya kagiatan kapaudan pihak Himpaudi kacamatan waragad kagiatan sok diteumbeuhkeun ka pihak pengelola Paud, eukeur mah SPP teu lancar, can meunang bantuan, ari wargad kagiatan kudu mayar.

"Ku lantaran kober abdi mah can didaptarkeun ka dinas janten upami aya acara kagiatan teh teu aya uleman. Ah mending oge bebas tapi kurikulum tetep ka dina," ceuk Bu Nar, guru Paud Bandung Barat.

Ari sakedahna mah diperhatoskeun, da ngandelkeun SPP murid mah tebih ti cekap," pokna deui ka sundaonline.com basa ditanya ngeunaan Kober Paud nu tacan meunang bantuan ti pamarentah. [] Ida Rukmana