Wa Uci Ulin Timbangan, Jati Kasilih ku Junti

Rahmat Sanusi alias Wa Uci.

Aliran penca silat di Jawa Barat kaitung loba, aya Cimande, Cikalong, jeung aya oge aliran Ulin Timbangan. "Tapi Ulin Timbangan mah sabenerna lain penca silat, leuwih payus disebut seni bela diri mandiri anu misah tina aliran penca silat," ceuk Rahmat Sanusi nu sapopoena katelah Wa Uci ka sundaonline.com, sawatara waktu kaliwat.

Nu dialajar seni bela diri Ulin Timbangan mah, Wa Uci ngajentrekeun, lolobana geus boga dasar kaparigelan penca silat. Ku sabab kitu, euweuh salahna Ulin Timbangan disajajarkeun jeung penca silat.

Anu mimiti ngadegkeun atawa nyiptakeun seni bela diri Ulin Timbangan nya eta Rd. Anggakusumah, putrana Haji Adra'i, salah saurang panghulu di Sumedang nu dilahirkeun dina taun 1887. "Mimiti mekarkeun seni bela diri Ulin Timbangan taun 1928," ceuk Wa Uci nu kiwari matuh di Kampung Krenceng Kacamatan Baleendah Kabupaten Bandung."Alhamdulilah nepi ka kiwari Ulin Timbangan aya keneh tur masih ngamuridkeun. Malah sataun nu kaliwat aya bangsa deungeun nu nalungtik asal usulna jeung kamekaranana." pokna deui.

Wa Uci netelakeun, seni bela diri Ulin Timbangan mah ngan saukur pikeun ngajaga diri, digunakeunana lamun aya anu nyerang. Kitu deui jenisna, aya dua versi, nya eta versi laga jeung versi alami. versi laga sok ditandingkeun dina kagiatan. Ari anu diajarkeun ku Rahmat Sanusi mah, ti bihari nepi ka kiwari versi alami nu dumasar kana pakem ti guruna. "Ngan wae kadieunakeun, ku lobana budaya deungeun anu ngalir ka Indonesia, seni bela diri Ulin Timbangan jadi tumpur alatan jati kasilih ku junti," ceuk Rahmat Sanusi anu lian ti jadi pelatih Ulin Timbangan teh oge katelah jadi mubaligh atawa da'i di wewengkon Kacamatan Baleendah. [] Ida Rukmana