Warung Sangu Marlina, Ngajeujeuhkeun Gajih Pangsiun

ilustrasi

Teu saeutik Pegawai Negeri Sipil (PNS) nu geus purnabakti, cicing di imah teh ngarumas. Pangpangna mah ngarasa kacongcay pangasilan alias gajih. Nu biasana katarima 100 persen, geus pangsiun mah jadi ngurangan.

Tapi pikeun Bu Marlina mah henteu kitu, sabab sabada carogena, Pa Gumelar, pangsiun teh, ngahaja neangan kasibukan bari henteu ninggalkeun kawajiban ngurus rumah tangga, nya eta muka warung sangu nu langganan utamana para mahasiswa. Ma'lum warung Marlina teh perenahna di wewengkon puseur pendidikan, pancegna di Perum Sarijadi Blok 8 Kota Bandung.

Numutkeun pangakuannana, muka warung sangu teh mimitina mah nyona-nyoba, ngajeujeuhkeun duit pangsiunan carogena. Tapi lila-lila mah jadi haneuteun oge, malah lolobana mah langgananana teh para mahasiswa jeung para pagawe kantoran. Tambahna ti eta, ngahaja nyieun kasibukan sangkan nu jadi carogena henteu ngarumas cicing di imah pedah geus purnabakti tina tugas jadi PNS.

"Alhamdulilah abdi tos dua taun muka warung sangu tiasa ngabayuan pun anak kuliah dugi ka tamatna, sarta kungsi babakti di kantor Pemkab Bandung.

Mungkas obrolanana Marlina katut carogena, ngebrehkeun cita-citana, hayang tinekanan ngalaksanakaeun ibadah haji ka tanah suci Mekah. Mugia bae cenah usaha jeung ihtiar nu sareatna dagang sangu, ari rajin nabung mah, susuganan wae diparengkeun ku Allah SWT, kabiruyungan ngalakonan ibadah haji, cenah.

"Bade naon deui atuh, hirup di alam dunya mah salian ti kedah seueur amal jariah. Lubak-libuk ku harta oge percumah, da dina waktuna maot mah, gaduh naon wae oge moal dicandak, kajabi amal kasaean," Ibu Marlina mungkas obrolanana jeung sundaonline. [] Ida Rukmana