Wawan HNM Nyieun “Kaahengan”

Wawan Hidayat Nedi M. | sundaonline.com 

Insya Alloh, tanggal 16 Januari 2016, bakal aya kaahengan pikeun urang Sunda, utamana pikeun Wawan Hidayat Nedi M anu sok dilandih Kang Wawan. Pangna disebut aheng, sabab dina poe eta buku anu judulna “Kaahengan” baris medal. Eta buku anu make basa Sunda teh ditulis ku Kang Wawan. “Manawi Alloh marengkeun, dina waktosna launching, urang riung mungpulung sareng para inohong Sunda,” cek Kang Wawan basa pareng ngawangkong jeung sundaonline.com di bumina KH Entis Maulana Sidiq, di Cibisoro, Katapang, Kabupaten Bandung, salasa, 8 Desember 2015.

Kang Wawan ngejentrekeun, eta buku anu ngawengku leuwih ti 400 halaman teh mangrupa buku jilid kahiji. Hartina sabada eta buku medal, bakal disusul ku buku “Kaahengan” jilid kadua jeung saterusna. Tangtu wae eta buku ukuran A5 teh kaasup buku anu kandel.

Nu matak buku “Kaahengan” bakal mangjilid-jilid teh gambaran yen di Tatar Sunda loba kaahengan. Awahing ku lobana, eta kaahengan henteu cukup upama dimuat ku hiji buku. Nu dimaksud kaahengan dina eta buku lain hal anu patula-patali jeung supranatural wungkul, tapi kaasup kamonesan-kamonesan anu dipimilik ku urang Sunda. Upamana wae kamonesan hiji jalma anu ngulik kana elmu pangobatan anu ahirna bisa ngubaran rupa-rupa panyakit anu ku dokter mah geus teu bisa diubaran.

Kang Wawan teh pangsiunan Pegawai Negeri Sipil (PNS) Pendam III/Siliwangi (Penerangan Kodam III/Siliwangi). Samemehna Kang Wawan kungsi jadi wartawan “Pikiran Rakyat”, Koran Harian Sunda “Sipatahunan”, “Galura”, “Bandung Pos”, Mingguan “Bina Kota” Pemkot Bandung, Harian “Angkatan Bersenjata” jeung Majalah Basa Sunda “Mangle”, jadi Wakil Pimpinan Umum Majalah Sunda “Salaka” jeung Majalah Koperasi “Rawayan” Dekopinwil Jabar. 

Dina widang jurnalistik, Kang Wawan kungsi dileler juara II tingkat nasional, dina lomba penulisan pegadaian. Dina widang organisasi, Kang Wawan aktip marajian KSSB (Kelompok Studi Sastra Bandung) babarengan jeung Aam Muharam, Dali Sumarli, Karno Kartadibrata, R. Sumarna, Usep Romli HM, jeung Holisoh ME. Dina taun 1980-an, Kang Wawan ngadegkeun Himpunan Penulis Muda “Lontar” Jawa Barat, babarengan jeung DR Drs Tatto Sutamto, Msi, Rachmat Dst (almarhum), Djodi Priatna, Suparyat Fauzi, Adang S (Serda) jeung Deddi Effendi. Dina HPM Lontar jadi Sekretaris Umum, tug jadi Ketua Umumna. Di HPM Lontar, meh saban taun ngayakeun lomba maca puisi sa-Jawa Barat. 

Di Majalah Mangle salian ti ngasuh Mangle Rumaja, remen ngayakeun pasanggiri maca puisi jeung cover Mojang Mangle, dihususkeun keur kaom wanoja di tatar Pasundan. Salian ti kitu, remen nulis masalah hukum jeung rubrik “Nyingraykeun Lalangse Aheng” (NLA). Malah kungsi ngadegkeun Forum Silaturahmi Pengobatan Tradisional jeung Spiritual (FSPTS) jeung Apetssi (Asosiasi Pengobatan Tradisional Supranatural jeung Spiritual Indonesia) Jawa Barat. Kungsi deuih ngadegkeun MKI (Masarakat Koperasi Indonesia) Jawa Barat, babarngan jeung DR Drs Tatto Sutamto, MSi, Aam Muharam, Fahrudin, SPd, PNS ti Polda Jabar, Ira Mambo, SH, MH, katut Yuyun Sri Yunendah, SPd.

Launching buku “Kaahengan” teh bakal dibageakeun ku para inohong Sunda, kaasup puluhan “tokoh aheng” anu ditulis dina eta buku. Malahan, numutkeun rencana mah, Ridwan Kamil salaku Walikota Bandung oge bakal ngaluuhan eta acara. Tempat launching-na di hiji hotel, di Kota Bandung. [] Ida Rukmana/Endang GG