Ariep Kabentar Gelap Sakujur Awakna Tutung

Ariep Hermawan (38), warga RT 03 RW 05, Desa Bojongmas, Kacamatan Solokanjeruk, Kabupaten Bandung, sawatara minggu ka tukang, kira-kira tabuh lima sore, kabentar gelap nepi ka sakujur awakna tutung.

Kapala Desa Bojongmas, Deddi, SPd, ngaenyakeun ayana salah saurang wargana anu kamusibahan kabentar gelap. Kajadianana waktu Ariep rek ngahiberkeun manuk japati kameumeutna.

Harita basa rek ngahiberkeun japati di buruan, dina kaayaan hujan miripis. Sabot kitu ujug-ujug aya gelap alias petir nyamber Ariep nepi ka kekerepengan sarta sakujur awakna tutung. Masarakat katut unsur pamarentahan Desa Bojongmas langsung mawa mobil siaga nu ditagogkeun di bale desa.

Korban dibawa ka Klinik Herlina di Desa Majasetra Kacamatan Majalaya."Alhamdulillah korban bisa katulungan sarta kiwari tapakna tarutung keneh,"ceuk Deddi ka sundaonloine.com. [] Ida Rukmana