Tepung Lawung Admin Purpas di Saung Futsal My & Me

Panglawungan para admin Purpas di saung futsal My and Me. | sundaonline.com

Poe minggu nu anyar kaliwat, di saung futsal My and Me Soreang, jul-jol para tamu, kalayan dibageakeun ku Hj. Enung miwah H. Memet. Harita teh aya tepung lawung para admin Paguyuban Urang Pasundan (Purpas). Abdul Fatah, pupuhuna Purpas ti Tangerang leuwih gasik datangna, disusul Enin Galuh Galih ti Ciamis anu ngahaja ngaluuhan.

Memang nu diondang para admin ngan sababaraha urang, tapi geus ngahasilkeun kasaluyuan yen Purpas bakal diakte-notariskeun. Purpas jeung gerakan masarakat Sunda tandang makalangan (Gemastana) bakal dihijikeun, salian ti ngokolakeun sastra, sosial, budaya, kagiatan usaha oge kudu. Abdul Fatah netelakeun, pangna dinotariskeun Purpas teh hayang jadi organisasi nu lehal, tur dipiharep Purpas dina ngahontal kamajuan bisa ngabelenyeng tarik.

"Ngan dipiharep teh saatos gaduh payung hukum, pareng aya kagiatan Purpas, para anggota tiasa sarumping tur nyukseskeun acara," ceuk Yani anggota Purpas nu katingali paling aktif.

Tapi nyakitu kangaranan media sosial mah najan jumlah anggotana ngarebu dina tepung lawung teu bisa diandelkeun daratang, ieu hal kudu jadi pamikiran pihak pangurus kumaha kahareupna mun aya acara kagiatan naon wae kudu jadi pangirut para anggota. Hj. Enung boga kayakinan mun Purpas nembongkeun kagiatan nu bisa mangpaat keur balarea insya Alloh bakal dideugdeug ku para anggotana, katut masarakat sejenna. Ku lantaran pangurus Purpas loba nu di Bandung dina eta riungan diputuskeun yen kantor Purpas/ Gemastana di Gedong Futsal My and Me Soreang Kabupaten Bandung. [] Ida Rukmana