Sanggeus Ngirim Pincuk ka Lokasi Banjir, LSM BM rek Baksos Deui

Ketua LSM Bela Masyarakat (BM), H. Agus Setiawan. | sundaonline.com

Salasa, 5 April 2016, insya Alloh Lembaga Swadaya Masyarakat (LSM) Bela Masyarakat (BM) baris ngayakeun bakti sosial (baksos) di Cimaung, Banjaran, Pameungpeuk jeung Cangkuang, Kabupaten Bandung. Dina eta acara bakal aya sawatara kagiatan sosial kayaning pangobatan haratis pikeun nu nandangan kasakit katarak, sarta pembagian sembako pikeun kaom jompo jeung barudak yatim piatu. “Eta baksos teh tos diagendakeun tilu sasih sakali,” cek Ketua LSM BM, H. Agus Setiawan, basa ngawangkong jeung sundaonline.com di kantorna, Jalan Tenjolaya Desa Ciluncat Kecamatan Cangkuang Kabupaten Bandung, Salasa, 22 Maret 2016.

Di hareupeun staf-stafna, H. Agus Setiawan netelakeun, cik keneh oge, persisna poe Rebo, 16 Maret 2016, tabuh 17.30-18.30, BM geus ngayakeun baksos pikeun korban musibah banjir di wewengkon Bojongmanggu, Pameungpeuk, Kabupaten Bandung. Dina eta baksos, BM ngabagikeun 100 pincuk sangu (katut dengeunna jeung caina), oge duit. Sacara simbolis eta pincuk teh ditarima ku Ketua RW 08 kalayan suka bungah. 

Para staf DPP LSM BM. Pa Arif, Pa Hendra (tukang), Pa Nana jeung Pa Dani (hareup). 
| sundaonline.com

Cek H. Agus Setiawan, baksos ka Bojongmanggu mah teu kaasup kana agenda tilu bulanan. Eta acara sipatna dadakan alias insidentil. “Tilu jam sateuacanna prung, BM nampi iber ti urang Bojongmanggu rehna korban musibah banjir di eta wewengkon tacan pisan nampi bantosan, boh ti aparat satempat, boh ti pihak sanesna. Nya sabada diiberan kitu BM rikat ngayakeun baksos ka eta wewengkon,” H. Agus Setiawan ngajentrekeun. “Ti BM aya lima belas jalmi anu ngiringan ka lokasi,” pokna deui dihaminan ku para stafna, Pa Hendra, Pa Dani, Pa Arif jeung Pa Nana.

Waragad pikeun ngayakeun eta baksos mangrupa hasil swadaya, nya eta hasil pemberdayaan anggota LSM BM anu di tingkat pusat ngawengku kurang leuwih 30 urang. Ngeunaan jumlah anggota, cek H. Agus Setiawan, mun dijujut ti awalna mah aya kana sarebuna. Ngan ku sabab fluktuatif, wangkid ayeuna anggota LSM BM sakabupaten Bandung anu eksis teh kurang leuwih 500 urang. Umur LSM BM kiwari kakara tilu taun jalan. Sanajan masih kasebutna anyar, dina prak-prakanana bajuang ngawujudkeun visi jeung misina mah BM satekah polah hayang nembongkeun pamadegan anu asak jeujeuhan. “BM teh apan lembaga sosial sareng kemanusiaan murni pikeun ngabela masarakat. Ku kituna BM moal nampi calon anggota anu mentalna preman. Upami premanisme aya dina hiji LSM, tanwande eta LSM bakal janten lembaga anu sok nyingsieunan masarakat,” H. Agus Setiawan nandeskeun.

Ku kituna, dina emprona mere bantuan ka masarakat oge BM mah sakamampuhna bae. Teu maksakeun maneh pikeun sosoroh ka calon donatur. Sanajan kitu, alhamdulillah, cek H. Agus Setiawan, rupa-rupa baksos geus dilaksanakeun ku BM, kaasup sunatan massal anu anyar kaliwat. [] ram