Diajar ka Sakadang Kuda

Ilustrasi

Aya maung keur ngalungsar di handapeun tangkal kiara, geus teu bisa walakaya tina kakolotan jeung gering ripuh. Beurang peuting gawena ngan humaregung, kahujanan kapanasan teh teu bisa ingkah. Atuh da sumawonna kaduga pindah, geus teu kuateun usik-usik acan. Ayeuna mah ngan empes-empes we sahoseun teh estu lain bobohongan.

Tadina mah sato-sato sejen teh mani gigis sarieuneun euweuh anu wanieun deukeut-deuket acan ngadenge gaur maung teh.

Tapi barang geus kanyahoan mah yen eta maung keur sakarat, rob wae ngaronom, pada narempo, pada nalokeran sagala.

“Euleuh kutan kitu cucungikna nu sok nekuk batur aing teh! Cing pek aing udag, deuleu!” omong peucang ditompokeun kana ceulina bari keletrak maung teh ditakol.

“Hayoh siah, ari wani mah urang jogol jeung aing, montong make pepeleyean!” ceuk munding bari jekuk wae digadil ku tandukna.

Rupa-rupa tingkah sasatoan teh pada-pada hayang mulangkeun kanyeri, nembongkeun kaceuceub ka musuhna nu geus teu daya teu upaya.

Ngan sakadang ku ngahuleng wae teh, teu lemek teu nyarek, gawena ngan godeg wae ti kaanggangan. 

“Na sakadang kuda ngan dikir wae, mun jiplak wae kadinyah sepak lebah iga burungna! Na teu inget bareto anak sampean si Belo dikerekeb ku ieu mangkeluk?” ceuk peucang.

Kuda malengos bari cumalimba, omongna, “Kadongdora, kajeun wani ka nu geus taya dayana. Muga aing mah jeung saturunan aing ulah dipaparin tekad hayang nganiaya ka nu lian, sumawonna ka nu geus taya tangan pangawasa mah.” [] ewo