Hese Modal, Industri Konveksi Kabupaten Bandung Gejed

Ketua APIK (Asosiasi Pengusaha Industri Konveksi), Drs. Amirudin. | sundaonline.com

Kiwari pangusaha konveksi di Kabupaten Bandung keur lesu. Paingan atuh Dra. Hj. Gina Haryati G., M.Pd, netelakeun yen laju pertumbuhan ekonomi (LPE) Kabupaten Bandung taun 2015 teh turun jadi 5,47. Samemehna, taun 2014, 5,92. Samemehna deui, taun 2013, 5,96. Nu alus mah ti taun 2011 ka taun 2012, nya eta tina 5,94 jadi 6,15.

Turunna LPE Kabupaten Bandung karasaeun pisan ku Drs. Amirudin mah. Salaku Ketua APIK (Asosiasi Pengusaha Industri Konveksi), Amirudin netelakeun yen kiwari pangusaha konveksi di Kabupaten Bandung keur limpeu. Anu jadi sababna nya eta hesena permodalan cenah. Ku kituna, kalintang diperelukeunana perhatian ti pamarentah.

Memang lain permodalan wae anu kudu diungkulan teh. Kualitas sumber daya manusia, kaparigelan administrasi—utamana dina mateahkeun modal supaya henteu tumpur, sarta pelatihan-pelatihan lianna oge mangrupa hal-hal anu kacida diperelukeunana.

Cek Amirudin, ari order mah loba, malah meh teu katadah. Ngan ku lantaran taya modal, nya seuseut we barangjieun teh, da taya modal mah jadi hese ngayakeun bahan baku oge. Lamun nginjeum duit ka bank, hese ku jaminanana. Malah, sanajan make jaminan oge, tungtungna teu di-acc pikeun nampa modal, da kabaud ku masalah BI Checking. Ari pangna kabaud ku BI Checking, sabab rata-rata arinyana boga masalah dina ngiridit motor.

Tapi Amirudin teu peunggas harepan. Inyana rek satekah polah sangkan bisa ngungkulan masalahna. Inyana yakin, industri konveksi di Kabupaten Bandung bakal menyat seug dibantu ku pamarentah. APIK moal petot-petot ngarojong 300 anggotana, boh dina pemasaran boh dina legalitas usaha, pon nyakitu dina permodalan. “Ku kituna, APIK bade ngayakeun hubungan sareng lembaga-lembaga keuangan, BUMN, Koperasi, UKM, sareng sajabina ti eta,” cek Amirudin ka sundaonline.com, di kantorna, Jalan Juntihilir Kabupaten Bandung, Kemis, 15 April 2016.

Salila ieu, Amirudin ngajentrekeun, para pangusaha konveksi nyieun produk teh dumasar kana pesenan. Sakeudeung deui, dina raraga nyanghareupan taun ajaran anyar, bakal ngaleuyah deui pesenan teh. “Cik keneh, di Jakarta, abdi tos ngiringan gempungan sareng kapala-kapala dinas ti sakuliah Indonesia, aya anu ti Medan, Gorontalo, Makasar sareng sajabina. Intina magunemkeun perkawis pengadaan saragam sakola. Tujuanana supados para orangtua murid kabantos, tiasa ngagaleuh saragam sakola ku pangaos anu mirah,” pokna.

Ku lobana pesenan, APIK baris ngabagikeun eta pesenan ka para anggotana anu luyu jeung bidang garapanana. Hartina, cek Amirudin, dina barangjieunna, para pangusaha konveksi teh henteu sarua. Aya anu husus nyieunan jas, aya anu husus nyieunan kameja, aya oge anu husus nyieunan baju olahraga jeung sajabana.

Sugan we eta pesenan dina raraga nyanghareupan taun ajaran baru teh bisa katedunan. Hartina, para pangusaha konveksi teh sing digampilkeun modalna. Lebar upama teu katedunan teh. Batur mah paboro-boro hayang meunang order (pesenan) teh. Angot ayeuna geus mangsana MEA (Masyarakat Ekonomi Asean). Ulah nepi ka order kasorobot ku batur. [] ram