Ikatan Suami Takut Istri, Buah tina Emansipasi Wanita?

Loba lalaki anu sieun ku pamajikanana. | sundaonline.com/ram

Tanggal 21 April teh lain bae disebut Hari Kartini, tapi Hari Emansipasi Wanita. Ari emansipasi wanita nya eta buah tina perjuanganana R. A. Kartini. Ku sukses-suksesna eta emansipasi, kiwari di masarakat beuki loba kaom hawa anu mapakan kaom lalaki. Malah leuwih ti kitu. Danget ieu loba lalaki anu harkat darajatna sahandapeun kaom awewe. Di kantor, di pabrik, di pausahaan, loba kaom lalaki anu ngadunungan ka kaom hawa. Pon nyakitu dina rumah tangga. Loba salaki anu eleh—lain ngelehan—ku pamajikan. Beh dituna teu sauetik salaki anu sieun ku pamajikan.

Dina hiji mangsa aya dua lalaki keur silih udarkeun rasa. Lalaki kahiji nanya ka lalaki kadua. “Ari inya anggota ISTI?”

“Naon ISTI teh?” lalaki kadua malik nanya.

“ISTI teh Ikatan Suami Takut Istri,” walon lalaki kahiji.

Dijelaskeun kitu teh, lalaki kadua unggeuk lalaunan bari ceulina semu beureum. “Ari inya anggota ISTI?” eta lalaki kadua malik nanya deui.

Lalaki kahiji gideug. Bari kekecrek, lalaki kadua ngacungkeun jempolna tandaning milu reueus. “Hebat atuh lain anggota ISTI mah,” cek lalaki kadua.

“Puguh we, da uing mah ketuana,” tempas lalaki kahiji.

“Ketuana????” lalaki kadua kerung.

“Enya, lain anggotana uing mah di ISTI teh ketuana,” lalaki kahiji nyakakak. Atuh lalaki kadua oge milu nyakakak.

“Sarua atuh ari kitu mah, malah inya mah leuwih-leuwih, da ketuana,” omong lalaki kadua.

Eta istilah ISTI bangun geus jadi babasan pikeun kaom salaki anu sieun ku pamajikanana. Enya babasan, lain guyonan, da kasieunna salaki ka nu jadi pamajikanana kiwari mah geus lain sisiwo, tapi geus mangrupa fenomena sosial anu serieus. Sakali deui, ieu teh ciciren suksesna emansipasi wanita anu geus sanggup meruhkeun kakawasaan kaom lalaki dina ampir sagala widang kahirupan.

Tapi, naha enya maksud emansipasi wanita anu diperjoangkeun ku R. A. Kartini teh ngarah nepi ka kituna? Kawasna mah henteu kitu. Sakur awewe anu normal tangtu midangdam pisalakieunana anu bisa jadi imam dina kahirupan rumah tanggana. Awewe anu normal henteu suka upama salakina elehan. Sanes kitu? Cag ah! [] Endang GG