Loba nu Poho kana Milangkalana Kabupaten Bandung

Sanajan loba sepanduk model kitu, angger bae loba warga nu poho kana poean milangkalana Kabupaten Bandung anu ka-375. | sundaonline.com/ram

Pa Dea (48) curinghak basa kuring nyebutkeun milangkalana Kabupaten Bandung anu ka-375 taun teh. “Oh, ayeuna teh ulang taunna Kabupaten Bandung!” pokna rada rungah-ringeuh waktu kuring nganjang ka imahna, di Kiaraeunyeuh, Katapang, Kabupaten Bandung, Rebo, 20 April 2016. “Abong riweuh bae ku deadline,” pokna deui bari garo-garo teu ateul kana sirahna.

Pikeun kuring mah, sikep Pa Dea samodel kitu teu matak aneh. Da puguh lain manehna wungkul anu teu ingeteun kana poean milangkalana Kabupaten Bandung teh. Nu saimah jeung kuring oge teu ingeteun. Tatangga anu gigireun, hareupeun, tukangeun, sarua deuih henteu aringeteun kana poean milangkalana Kabupaten Bandung. Duka ku naon. Da piraku ari tuna informasi mah. Apan sakitu sidikna sepanduk di sisi jalan ngajeblag ngebrehkeun yen Kabupaten Bandung teh dina tanggal 20 April 2016 nincak kana umurna anu ka-375 taun.

Ku sabab loba nu teu ingeteun, munasabah seug loba anggota masarakat nu teu milu aub kana acara “Semarak Pesta Rakyat Hari Jadi Kabupaten Bandung ke-375” anu lumangsung di Dome Bale Rame Sabilulungan, Soreang, Kabupaten Bandung, ti tanggal 22 nepi ka 24 April 2016. “Bujeng-bujeng ngiringan pesta, ngemutan runtah oge jangar,” cek Ibu Sri (45), warga perumahan Sanggar Indah Banjaran, Kabupaten Bandung.

Runtah? Enya cenah runtah geus ngagugunung teu diangkut wae ku patugas. Bareto mah saminggu dua kali runtah teh diangkutna, ayeuna mah nitih dua minggu sakali oge henteu.

“Sumuhun, bujeng-bujeng ngiringan pesta, ngemutan ongkos sakola sareng jajan barudak oge rieut,” cek Ibu Yeti (40), tatanggana Ibu Sri. “Atuh da pun lanceuk tos lami teu nampi orderan,” pokna deui ngaheruk.

Loba warga masyarakat Kabupaten Bandung anu katungkulkeun ku kasusah hirup, tug ka maranehna poho kana poean milangkalana Kabupaten Bandung. [] EGG