Asas Kaadilan, Patokan dina PPDB 2016

Kang Emil keur mere katerangan PPDB 2016 ka reporter. | sundaonline.com

Pangalaman peuheur dina Penerimaan Peserta Didik Baru (PPDB) taun 2015 moal kasorang deui dina PPDB 2016. Hartina sakumna warga Kota Bandung meujeuhna rek suka bungah dina mangsana PPDB taun ayeuna mah. Pangna kitu, apan PPDB 2016 mah geus diropea. Hasil pangropeana dipintonkeun ku Dinas Pendidikan (Disdik) Kota Bandung, dina acara “Sosialisasi dan Penguatan Peraturan Wali Kota (Perwal) tentang PPDB 2016”, di Hotel Grand Royal Panghegar, Kemis (26/5). 

Walikota Bandung, Ridwan Kamil anu katelah Kang Emil biantara ngeunaan PPDB 2016 di payuneun para kapala sakola, guru, camat, lurah, katut sawatara aktivis ormas. Intina, Kang Emil mere pangreugreug ka sakumna warga nu rek nyakolakeun anak-anakna di Kota Bandung. PPDB 2016 mah nyoko kana asas kaadilan. Ku kituna, moal kajadian deui jalma jegud make Surat Keterangan Tidak Mampu (SKTM) demi nuluykeun sakola nu jadi anakna. Dina PPDB 2016 mah hayang meunang SKTM teh moal babari kawas taun kamari. Nu ngamprah SKTM kudu daek dipotret di imahna bari ditungkulan ku patugas ti kalurahan. Ku ayana potret bakal kanyahoan payus henteuna eta kulawarga nampa SKTM. 

Pokona aya 10 jalur dina PPDB 2016 teh. Eta 10 jalur teh kudu dijentrekeun ku pihak sakola ka murid/wali muridna sacara hususon. Hartina, upama aya murid rek nuluykeun sakola make SKTM, jentrekeun ku guruna ka eta murid/wali murid ngeunaan jalur SKTM. Teu kudu ngajelaskeun jalur-jalur nu sejenna. Upama aya murid rek nuluykeun sakola make jalur prestasi, nya jalur prestasi we nu dijentrekeun ku guruna teh. Ku cara kitu, masarakat moal salah paham dina PPDB 2016.

Upama di lapangan aya pasualan anu hese diungkulanana, misalna aya jalma maksa ngajak KKN dina urusan ngasupkeun anakna ka hiji sakola, tong asa-asa, langsung bae laporkeun ka Kang Emil. Intina, sakali deui, asas kaadilan dina PPDB 2016 kudu jadi patokan. [] ram