Jadi Babu di Imah Sorangan

Nu ngarayakeun "May Day" bari ngotoran salah sahiji ornamen di Taman
Kota Soreang Kabupaten Bandung. | sundaonline.com/ram

May Day taun ieu teu bina ti taun-taun samemehna. Angger wae sok dijadikeun momentum pikeun kaom buruh ngayakeun demo. Ieu kanyataan netelakeun yen kaom buruh di urang henteu kreatif dina cara ngolah pamadegan hirupna. Kuring kungsi ngawangkong jeung Ir. Bambang Suteja, pangusaha di Bandung. Cek inyana, hadena kaom buruh pirajeunan nitenan kaayaan make kacamata pangusaha. Ulah hayang jadi kaom buruh saendeng-endeng. Naha? Apan sidik, teu genah jadi kaom buruh mah. Upama genah mah moal enya make jeung demo sagala.

Hesena jadi pangusaha sarua jeung hesena kaom buruh dina ngaronjatkeun harkat martabatna. Ku sabab pada-pada hese, mending jadi pangusaha, hese oge puguh deui jadi pangusaha mah melaan pausahaan sorangan. Geura lenyepan, rek nepi ka iraha kaom buruh tihothat tipoporose demi ngawangun karaton nu jadi dununganana? Apan geus tangtu genahna seug ngawangun karaton sorangan mah, sanajan sarua samemehna kudu tihothat jeung tipoporose.

Pikeun nyimbutan kakuranganana, loba pagawe (kaom buruh) anu mere alesan teu boga modal, seug jadi pangusaha teh. Padahal, cek Kepala Bidang Pengembangan Usaha Mikro, Kecil dan Menengah, Kabupaten Bandung, H. Pujo Semedi, SH, eta alesan teh geus teu pantes dikukut, sabab geus jadi alesan anu kuno. Modal nu utama dina usaha mah kawani, cenah. Modal (duit) mah nuturkeun.

Ngan nya eta hese nimbulkeun kawani teh. Lolobana bangsa urang mah epes meer. Can nanaon geus sieun pikeun ngawangun pausahaan teh. Antukna sakola luhur-luhur oge cigna jadi pagawe deui, ngadunungan ka batur. Leuheung nu disebut batur teh babaturan atawa dulur, da ieu mah batur teh aslina batur balangbangan. Bangsa deungeun. Angot ayeuna geus jamanna MEA (Masyarakat Ekonomi Asean). Bangsa urang kalah ka surak rek jaradi pagawe di pausahaan asing anu ngadeg di lemah cai urang. Puguh deui jaradi pagawe di mancanagara mah. Jadi pagawe di pausahaan asing nu ngadeg di lemah cai sorangan mah sasat jadi babu di imah sorangan. [] Endang GG