Keiray Setianugraha Juara Ngagambar

Keiray Setianugraha juara ngagambar.
| sundaonline.com

Basa sundaonline.com nganjang ka imahna di Jalan Sukaleueur Bandung, Kei pohara atohna. Atuh da Kei teh kakara meunang piala. Dua deuih pialana teh. Nu hiji piala Kei salaku pinalis dina acara Hari Kartini 2016 di TK Bhakti, Jalan Sukarma Bandung, anu hijina deui piala Kei salaku juara kahiji dina pasanggiri ngagambar jeung ngawarnaan wadah patlot. 

Duka bakal jadi naon jagana, nu pasti eta budak kelas enol kecil anu ngaran lengkepna Keiray Setianugraha teh resep pisan kana ngagambar. Eta karesepna teh bisa disebut teureuh ti indung bapana. Indungna Kei, Putri Santosa, memang resep kana ngalukis. Atuh bapana Kei, Firman Setianugraha, sarua deuih resep kana seni. Angot bapana mah meh kana sagala cabang seni karesepna teh. Malah bareto kuliahna oge di Sekolah Tinggi Seni Indonesia (STSI) Bandung, jurusan karawitan, sanajan ahirna inyana jadi desainer grafis.

Lian ti teureuh ti indung bapana, bisana Kei jadi juara teh ku lantaran atikan jeung apingan ti Ibu Iim Rohimah, guruna Kei. Carana Ibu Iim ngawulang, cek indungna Kei, kacida dipikaresepna ku Kei katut babaturanana. Ku sabab kitu, Kei teu weleh giak upama rek indit ka sakola teh. Angot sabada jadi juara mah. [] ram