Nu Ripuh ku Angin Puyuh

Imah Pa Nefri keur diomean sanggeus katarajang angin puyuh. | sundaonline.com

Poe Jumaah, 13 Mei 2016, bada solat ashar, Ibu Ros (72 ) sakulawarga meunang kareuwas. Kadenge ku arinyana sora dog-dag di luhureun imahna. Barang diriksakeun, eta sora dog-dag teh kenteng anu rabeng dibabuk ku angin puyuh ninggang kana suhunan imah tatanggana. Tina jandela katangen ku Ibu Ros sarimbit angin puyuh keur nguleng tatangkalan anu rajeg di hareupeun buruanana. Hadena eta tatangkalan teu nepi ka rungkad. Ngan orokaya, sawatara imah di Blok C5 Sanggar Indah Banjaran Kabupaten Bandung mah ruksak kababuk ku angin puyuh. 

Imahna Pa Nefri, tatanggana Ibu Ros anu beulah kenca, asbesna salapan lambar lesot dilaan ku angin puyuh. Atuh puguh we hateup imahna jadi molongpong. Anehna, cek warga di dinya, eta asbes anu salapan lambar teh ngiles teuing ka mendi dibawa ku angin puyuh. 

Pa Bambang, tatanggana Pa Nefri anu sapopoena sibuk jadi bandar rongsokan, oge sarua nandangan musibah . Hateup gudang rongsokanana lalesotan dirakrak ku angin puyuh. Sanajan kitu, sanggeus angin puyuhna liwat mah, kagiatan rongsokanana henteu nepi ka pugag. “Ngan upami hujan mah, tangtos we kahujanan gudang teh,” cek Pa Bambang anu, basa aya angin puyuh, ukur bisa ngadawamkeun adzan di imahna. 

Hareupeun imah Pa Bambang, nya eta imahna Pa Agus Mubarok anu keur kuriak, ruksak deuih hateupna. Tapi lain dikakat ku angin puyuh. Hateup imahna Pa Agus mah katinggang ku kenteng ti imah batur anu rabeng ditiup ku angin puyuh. Ku sabab kitu, niat Pa Agus rek melur buruan imahna teh pugag, da inyana kudu ngomean deui hateup. “Nya, kedah jajan deui we ka toko bangunan,” cek Pa Agus bari nyebutkeun yen pikeun ngomean hateup imahna teh butuh genep lambar asbes plastik jeung dua lambar fiber.

Gigireun pisan Pa Agus nya eta imahna Pa Nono. Sarua deuih hateup imahna ruksak katinggang ku kenteng anu rabeng dihiuk ku angin puyuh. Lian ti eta, imahna Pa Asep, Pa Charlie, oge raruksak ku angin puyuh.

Duka aya sabaraha imah anu ruksak kababuk ku angin puyuh di Kabupaten Bandung, utamana di Sanggar Indah Banjaran. Nepi ka berita ieu dijieun, tacan aya katerangan anu eces. Da geuning tacan aya aparat nu ngariksakeun. Nu tangtu loba imah jeung bangunan lianna anu ruksak, kaasup bangunan mini market anu ngajengleng di jalan utama Sanggar Indah Banjaran. 

Hadena taya korban jiwa. Sanajan kitu, teu saeutik warga Sanggar Indah Banjaran anu anpal panyakitna sabada ditarajang ku angin puyuh. Ibu Ros oge anpal panyawat sesekna. Malah aya warga anu nepi ka dirawat di rumah sakit sabada eta kajadian.

Panuhun sakabeh warga ka Pangeran anu Maha Kawasa, eta musibah ulah nepi ka kajadian deui. Ku ayana angin puyuh, kabingung masarakat alah batan ti kajadian gempa. Rek teu bingung kumaha, cicing di jero imah inggis katinggang ku hateup imah anu runtuh, cicing di luar imah inggis kababuk ku angin puyuh. Mangkaning, cek Ibu Atin anu ningali bungkeuleukanana, eta rupa angin puyuh teh pikasieuneun kawas buta, muihna rongkah alah batan kolecer helikopter, lumpatna lir pesawat jet. Matak meujeuhna loba jalma anu soak. Samar polah. Rawah-riwih. Tingkoceak. Tingjarerit. Teu nyaho kudu kumaha nya ketak iwal ti istighfar, menta pangampura ka Gusti nu Mahasuci. [] Endang GG