Ormas/LSM di Kabupaten Bandung Tuna Kabisa?

Kepala Bidang Politik Dalam Negeri dan Pembinaan Ormas Kabupaten Bandung, 
Dadang Hermawan, S.S.Ip.| sundaonline.com

Aneh, sakitu lolongkrangna geus dibikeun, basa dina acara “Sosialisasi Peningkatan Kemitraan dan Pemberdayaan Ormas/LSM”, di Hotel Saung Bilik Kabupaten Bandung, Rebo-Kemis, 13-14 April 2016, tapi tug ka danget ieu tacan aya aktivis Ormas/LSM anu daptar ka Disnaker Kabupaten Bandung pikeun nampa atikan. Padahal, pamarentah geus nyadiakeun waragad Rp 120 juta pikeun 20 aktivis, da apan jatah pikeun saurangna teh Rp 6 juta. 

“Kawasna mah dina jajaran organisasina eta Ormas/LSM tacan aya anggota anu kagungan skill. Ieu mah numutkeun suudzonna atanapi prediksi anu lepat ti Kabid,” cek Kepala Bidang Politik Dalam Negeri dan Pembinaan Ormas Kabupaten Bandung, Dadang Hermawan, S.S.Ip, ka sundaonline.com di kantorna, Senen, 9 Mei 2016.

Da jeung enyana, basa ngabagikeun materi anu judulna “Pemberdayaan Ormas dalam Menghadapi Dunia Kerja” di hareupeun puluhan aktivis Ormas/LSM di Hotel Saung Bilik tea, Lilis Darojah, S.Sos, M.Si netelakeun, aktivis Ormas/LSM anu bisa miluan atikan di Disnaker Kabupaten Bandung teh nya eta aktivis anu mibanda skill. Eta skill baris diasah ku Disnaker ngaliwatan program atikan malar mangpaat pikeun balarea.

Nilik kana galagat kitu, salaku peserta diklat RPP (Rancangan Proyek Perubahan), Dadang Hermawan moal cicingeun. Ormas, LSM atawa wawakilna, ku inyana rek diondang pikeun ngabentuk Forum Komunikasi Ormas/LSM Kabupaten Bandung tea. Dipiharep eta forum bisa jadi cukang pikeun Ormas/LSM jeung pamarentah. “Mung ayeuna mah sanes RPP, da Kepala Bidang Politik Dalam Negeri dan Pembinaan Ormas tos nincak kana LPP (Laporan Proyek Perubahan). Apan tos sakitu jentrena, RPP harita teh judulna Peningkatan Kemitraan dan Pemberdayaan Ormas/LSM di Kabupaten Bandung,” cek Dadang Hermawan. 

Pokona moal lila deui forum teh bakal ngawujud. Apan eta forum teh geus difasilitasi, oge geus disosialisasikeun ka Ormas/LSM di Kabupaten Bandung, malah geus dibewarakeun ka balarea ngaliwatan media cetak jeung radio. “Hanjakalna, ti Ormas/LSM tacan aya nu daptar,” Dadang Hermawan helokeun. [] ram