Pajabat (Urang Sunda) Teu Apal kana Undak-Usuk Basa Sunda

SMS ti salah saurang kapala bidang di Pamarentahan Kabupaten Bandung. 

| sundaonline.com 

Loba urang Sunda anu teu apal kana undak-usuk basa Sunda. Malah teu saeutik urang Sunda anu nyakola tapi balilu lebah cacarita make basa Sunda. Lain pangkat cacah wae deuih, dalah pangkat menak nu boga jabatan oge loba nu teu merenah dina cacarita ku basa Sunda. Geura ieu buktina, poe Kemis, 5 Mei 2016, salah saurang kabid (kapala bidang) di Pamarentahan Kabupaten Bandung nga-SMS anu unina kieu: “Hapunten Kang Wawan abdi kirang uninga”. 

Kasalahan dina eta SMS nya eta “abdi kirang uninga”. Ari kuduna pikeun sorangan mah, “abdi kirang terang”. Kecap “uninga” mah pikeun batur anu saluhureun atawa anu dipikaajrih ku urang. Contona dina kalimah, “Dupi Kang Wawan parantos uninga?”

Salian ti salah ngalarapkeun undak-usukna, eta SMS kabid teh nembongkeun katunana dina sual ngagunakeun tanda baca. Dina eta SMS taya pisan tanda baca. Teu koma, teu titik.

Lebah dieu kaciri, masarakat di Tatar Sunda kurang nolih kana panggeuing ti para pamingpinna. Padahal ku ayana “Rebo Nyunda” di Kota Bandung atawa “Kemis Nyunda” di Kabupaten Bandung teh bukti yen para pamingpin di Tatar Sunda netelakeun pentingna ngamumule budaya Sunda, kaasup ngamumule basana. Ari nu kasebut ngamumule, tangtu wae lain asal. Lain asal make basa Sunda. Lain asal lemes cacaritana dina basa Sunda. Ngamumule ngandung harti mupusti, milampah pagawean anu bener. Kaasup bener dina ngalarapkeun undak-usukna basa Sunda.

Ku lantaran “Rebo Nyunda” atawa “Kemis Nyunda” geus mangrupa kawijakan ti nu jadi pamingpin, atuh meujeuhna upama eta kawijakan diturut ku balarea. Angot ku pangkat kapala SKPD (Satuan Kerja Perangkat Daerah) katut rengrenganana mah. Dihenteu-henteu oge apan nu jadi aparat mah kudu jadi conto pikeun balarea. [] Endang GG