Runtahna Terus Nambahan, Sepandukna Lus-Les

Sepanduk anu rapang dina pager TPS Gandasari teh geus taya hiji-hiji acan. 
Runtahna we ngalobaan deui. | sundaonline.com

Pasosore, Senen (23/5), kuring ngulampreng deui ka Jalan Gandasari, Kacamatan Cangkuang, Kabupaten Bandung. Barang ngareret ka beulah kenca, TPS (Tempat Pembuangan Sampah) alias pamiceunan runtah di dinya anu geus ditutup ku pamarentah teh matak pikahemengeun. Rek teu hemeng kumaha, da geuning ayeuna mah sepanduk anu ngajeblag dina pager eta TPS teh geus taya hiji-hiji acan.

Dera, wanoja warga Kacamatan Cangkuang, Kabupaten Bandung, oge nepi ka gogodeg. Inyana sarua ngarasa hemeng. “Harianeun pisan jelema teh,” pokna ka sundaonline.com bari rut-ret ka kenca jeung ka katuhu ningali runtah anyar anu geus ngaleuyah deui di eta TPS. “Ayeuna mah tos nista maja utama,” pokna deui bari netelakeun yen pamarentah geus waktuna rikat mere hukuman ka balarea anu sok mariceun runtah ka TPS Gandasari nu geus ditutup.

Ayeuna mah Dera anu sapopoena sibuk ngajalankeun bisnis online teh percaya kana omonganana Pa Ajat, warga Jalan Gandasari. Cek Pa Ajat, leungitna sepanduk anu napel dina pager awi eta TPS teh didudut ku nu gelo. Da piraku ari jalma waras wani ngadudut sepanduk nu ngahaja dipasangkeun ku pamarentah mah. [] Endang GG