Saha nu Ngarocetan Plang Taman Kota Soreang?

Ku sabab kurang ditalingakeun, plang Taman Kota Soreang
diruksak jalma nu bangkar warah. | sundaonline.com/ram

Taman Kota Soreang Kabupaten Bandung teh ngahaja diadegkeun ku pamarentah geusan pangabetah masarakat Soreang jeung sabudeureunana. Ku balarea geus karasaeun mangpaatna. Ari isuk-isuk eta taman sok dipake ku nu olah raga. Sorena sok dipake pangulinan deuih. Angot barudak rumaja mah: ngaradon selfian di taman teh. Ku sabab kitu, nu ngaradon dagang di palebah taman oge teu saeutik, da puguh ku lobana jalma nu arulin di taman teh piduiteun. Ngan hanjakal, masarakatna teu jejeg kabeh. Aya we carekeunana. Geura eta plangna dirocetan ku pilok. 

Pamarentah mah geus kurang kumaha mapaesan eta taman malar endah katempona jeung pikabetaheun. Sawangsulna nu jadi rahayat teu bisa narimakeun kana kahadean pamarentah. Atuh lebah mana sabilulunganana antara pamarentah jeung rahayat? Lebah ngokolakeun taman kota anu mangrupa fasilitas umum oge mani kawas nu pakia-kiana. Teu sabanda teu sariksa ana kitu mah.

Kawasna, nilik kana eta kanyataan, pamarentah ulah kirang-kirang sabar. Eta plang anu tos dirocetan teh enggal disaean deui. Mung, upami tos disaean, eta taman kota kedah dijaga diriksa siang wengi (24 jam) sangkan rahayat anu goreng lampah henteu wani deui ngaruksak. Da moal enya aya nu wani ngaruksak kana eta taman seug pamarentah bener ngajaga ngariksana.

Duka rahayat nu mana anu kumawani ngaruksak taman teh. Basa kuring nalengteng ka nu araya di eta taman, poe Senen, 9 Mei 2016, taya saurang oge anu apaleun. Angot nepi ka aya nu ngaku mah. Cek nu araya di eta taman, itu mah ulah tangan-tangan jahil! [] Endang GG