Sanggeus Ripuh ku Angin Puyuh, Imahna Kabangsatan
 |
| Pa Agus keur ngarenovasi imahna anu kabangsatan. | sundaonline.com |
Cek babasan mah katurug katutuh. Atuh da cik keneh imahna ruksak katarajang ku angin puyuh, Jumaah,13 Mei 2016, Pa Agus geus kamusibahan deui, nya eta imahna kabangsatan. Duka wayah kumaha eta bangsat datangna teh. Nu puguh mah, basa Pa Agus ngariksakeun imahna, di Blok CV Sanggar Indah Banjaran Kabupaten Bandung, poe Senen, 16 Mei 2016, sapedah jeung sakabeh pakakasna leungit dikerid ku bangsat.
Pakakasna teh pakakas tukang bangunan kayaning mesin bor jeung sajabana. Pikeun Pa Agus mah leungitna eta pakakas teh matak buntu kalakuan. Mangkaning Pa Agus teh keur kuriak, ngawangun imahna ku sorangan, da teu boga waragad keur mayar tukang. Ma’lum Pa Agus teh keur sepi order.
Enya wirausaha pagawean Pa Agus teh. Tapi, sagala bisa eta bapana Salwa jeung Salma mah. Ti mimiti pagawean lemes nepi ka pagawean kasar bisa. Disain grafis bisa. Disain imah bisa. Disain eksterior jeung interior bisa. Pagawean teknik sipil bisa. Malah jadi tukang bangunanana oge bisa. Matakna, kuriak ngawangun imah sorangan oge bisa ku sorangan, asal aya bahan jeung pakakasna we cenah.
Ari ayeuna sakabeh pakakasna leungit dipaling bangsat. Atuh puguh ngajedud kana sirah teh. Pa Agus teu bisa ngahanca buruan anu keur dipelur.
Pangna bisa kabangsatan teh pedah imahna nu keur diwangun teh kosong, taya nu nyicingan. Salila ieu, anak-anakna Pa Agus idek liher di imah uwana. Atuh Pa Agus katut pamajikanana cicing di imah kontrakan. Ku kituna meujeuhna seug bangsat bisa nyalse ngerid barang nu aya di imahna Pa Agus. Kajadianana kawasna mah peuting, da ti isuk-isuk nepi ka sore mah apan sok katungguan ku Pa Agus anu keur baranggawe di imah eta. Si bangsat asup ka jero imah sanggeus ngabobol konci panto imah.
Ku ayana eta kajadian, lain Pa Agus wae anu tunggara teh. Pa Drajat, dahuanana Pa Agus anu imahna hareupeun imah Pa Agus oge kabawa tunggara. Soalna Pa Drajat neundeun sapedahna di imahna Pa Agus. Mangkaning eta sapedah teh kaasup hargaan, da sok dipake nga-gowes. Untungna Pa Drajat jeung Pa Agus sarimbit sadar kana papasten. Arinyana yakin, dina tiap katunggaraan nyangkaruk kahadean Gusti Nu Mahawelas tur Mahaasih. Saha nu apal, eta musibah teh jadi kiparat kana dosa. [] ram
Pakakasna teh pakakas tukang bangunan kayaning mesin bor jeung sajabana. Pikeun Pa Agus mah leungitna eta pakakas teh matak buntu kalakuan. Mangkaning Pa Agus teh keur kuriak, ngawangun imahna ku sorangan, da teu boga waragad keur mayar tukang. Ma’lum Pa Agus teh keur sepi order.
Enya wirausaha pagawean Pa Agus teh. Tapi, sagala bisa eta bapana Salwa jeung Salma mah. Ti mimiti pagawean lemes nepi ka pagawean kasar bisa. Disain grafis bisa. Disain imah bisa. Disain eksterior jeung interior bisa. Pagawean teknik sipil bisa. Malah jadi tukang bangunanana oge bisa. Matakna, kuriak ngawangun imah sorangan oge bisa ku sorangan, asal aya bahan jeung pakakasna we cenah.
Ari ayeuna sakabeh pakakasna leungit dipaling bangsat. Atuh puguh ngajedud kana sirah teh. Pa Agus teu bisa ngahanca buruan anu keur dipelur.
Pangna bisa kabangsatan teh pedah imahna nu keur diwangun teh kosong, taya nu nyicingan. Salila ieu, anak-anakna Pa Agus idek liher di imah uwana. Atuh Pa Agus katut pamajikanana cicing di imah kontrakan. Ku kituna meujeuhna seug bangsat bisa nyalse ngerid barang nu aya di imahna Pa Agus. Kajadianana kawasna mah peuting, da ti isuk-isuk nepi ka sore mah apan sok katungguan ku Pa Agus anu keur baranggawe di imah eta. Si bangsat asup ka jero imah sanggeus ngabobol konci panto imah.
Ku ayana eta kajadian, lain Pa Agus wae anu tunggara teh. Pa Drajat, dahuanana Pa Agus anu imahna hareupeun imah Pa Agus oge kabawa tunggara. Soalna Pa Drajat neundeun sapedahna di imahna Pa Agus. Mangkaning eta sapedah teh kaasup hargaan, da sok dipake nga-gowes. Untungna Pa Drajat jeung Pa Agus sarimbit sadar kana papasten. Arinyana yakin, dina tiap katunggaraan nyangkaruk kahadean Gusti Nu Mahawelas tur Mahaasih. Saha nu apal, eta musibah teh jadi kiparat kana dosa. [] ram
Komentar
Posting Komentar