Si Kabayan Dihukum Gantung

Ilustrasi Hukum Gantung.  | www.republika.co.id

Jaman baheula, aya raja nu pohara adil palamartana. Kakasihna kaceluk ka awun-awun kawentar ka janapria, nya eta Raden Mangguling. Hukum pati jaman harita ngan sarupa, nye eta digantung.

Hiji mangsa Si Kabayan bet kagembang ku putri bungsu, nu kakasihna Dewi Pramanik. Bakat ku kabungbulengan, wani asup ka pakarangan karaton bari mawa suling. “Dipelet ku sora suling aing, pasti beunang!” cek Si Kabayan ngomong sorangan waktu moncor pager karaton. Kakara oge moncor sirahna, kerewek bae ditewak ku prajurit karaton.

“Bangsat!” cek prajurit karaton.

“Sanes, bade nyuling di pipireun kamar Nyai Putri Bungsu!” tembal Si Kabayan.

“Teu meunang eta jalma asup ka pakarangan karaton. Salah teu salah, hukumanana sarupa, digantung!”

“Uing digantung?! Meureun paeh! Bae asal tepung heula jeung Nyai Putri!”

Isukna Si Kabayan dijagragkeun di pangadilan. Hakimna Kangjeng Raja: “Kabayan, manehn tetela boga kasalahan gede nya eta asup ka jero pakarangan karaton. Hukumanana aya di jero ieu surat. Bawa ku sorangan suratna ka tukang ngagantung jalma di Desa Pagantungan! Mun maneh teu nepi ka Desa Pagantungan, gantina indung bapa maneh digantung!”

Si Kabayan indit muru Desa Pagantungan, nepungan tukang ngagantung jalma tea. Ari gok, sihoreng Si Lamsijan, sobat dalitna pisan tukang ngagantung jalma teh.

“Jan, silaing? Atuh dewek bisa dibebaskeun!”

“Nenjo suratna mah dewek bisa nulungan.”

Eusi surat teh kieu: Nu mawa ieu surat gantung.

“Heueuh, jig we silaing mah balik!” cek Si Lamsijan. Leos bae Si Kabayan mah balik. Ari surat tea, dikomaan ku Si Lamsijan jadi kieu: Nu mawa, ieu surat gantung! Jadi, nu digantungna teh suratna.

Terus bae suratna teh digantung. Waktu Kangjeng Raja Mangguling ngaronda ka Desa Pagantungan, kaget ningali surat digantung. Terus dipariksa. Gelenyu imut bari pokna: “Salah kami nulisna bet make koma. Jadi weh suratna nu digantung teh!” cenah. [] Yuni Wulandari