TPS Gandasari Ditutup, Masarakat Kabupaten Bandung Angger Bedegong

TPS Gandasari geus ditutup. | sundaonline.com

Poe Jumaah (13/5), ti arah Banjaran Kabupaten Bandung, motor kuring dipangpengkeun ka katuhu ka Jalan Gandasari, da maksud teh rek ka Kota Bandung ngaliwatan Warunglobak. Harita teh can waktuna jumaahan, da kakara tabuh 10-an. Barang sup ka Jalan Gandasari, kuring kajebak macet. Sakabeh kandaraan di dinya majuna lalaunan. “Aya naon nya, aya ku macet-macet teuing,” lalaki tengah tuwuh nu tumpak motor gigireun kuring kutuk gendeng bari tanggah bawaning ku hayang sidik di hareup aya naon pangna nepi ka macet. Ised-ised kandaraan teh ngarayap. Sanggeus rada jauh majuna, kakara sidik, sihoreng nu matak macet teh aya pangerukan runtah anu geus ngagugunung di sisi Jalan Gandasari.

Alhamdulillah. Hate kuring atoh nataku. Piraku teu atoh, da puguh runtah nu ngagugunung di Jalan Gandasari teh pohara ngagangguna. Balarea oge ngarasaeun. Angot usum hujan mah. Gunungan runtah anu geus busuk teh kacida bauna. Meujeuhna seug nimbulkeun sasalad ka balarea oge. Runtah anu geus dikeduk teh tuluy diasupkeun kana treuk anu satuluyna diangkut teuing ka mendi. Hanjakal, eta kajadian teu bisa dipotret ku kamera hape kuring, da batrena keur low. 

Balik ti Kota Bandung, pasosore, bari dibaguded ku jas hujan, kuring ngaliwat deui ka Jalan Gandasari. Runtah nu ngagugunung teh geus lenglang. Pamiceunan runtah teh dipageran bari dipapaesan ku sepanduk anu unina: “TPS ini ditutup.... Dilarang membuang sampah di sini.” Anu nyieun eta sepanduk teh Dispertasih Pemkab Bandung. Diitung teh aya opat sepanduk anu ngajeblag dina sapanjang eta pager. Sepanduk anu mintonkeun gambar Bupati Bandung katut wakilna, diembohan ku gambar Camat Cangkuang, oge aya. Tangtu wae hal ieu teh pikeun netelakeun yen pamarentah henteu cicingeun dina perkara ngungkulan pasualan runtah di Kabupaten Bandung. Malah masarakat oge henteu cicingeun. Buktina disebutkeun dina sepanduk yen pangerukan runtah di Jalan Gandasari teh mangrupa hasil Kerjasama Pemerintah Kecamatan Cangkuang dengan Masyarakat, Ormas, LSM dan Pers. Ku direreyang kitu mah, asa piraku pasualan runtah di Kabupaten Bandung moal bisa kaungkulan.

Sanajan geus ditutup, nu mariceun runtah ka Jalan Gandasari angger aya. 
| sundaonline.com

Isukna, Saptu (14/5), kuring ngaliwat deui ka Jalan Gandasari, Kacamatan Cangkuang, Kabupaten Bandung. Barang ret ka pamiceunan runtah anu geus ditutup ku pamarentah, gebeg, hate ngarenjag, sabab kuring nempo runtah numpuk di deukeut tungtung pager eta tempat. 

Harita keneh kolbu rocop nataku. Bari tumpak motor, kuring ngagerendeng sorangan: tetela, masarakat Kabupaten Bandung—nu sok mariceun runtah sambarangan— teh bedegong ku kabodoanana. Da mun wijaksana (pinter) mah moal enya masarakat werat miceun runtah ka tempat anu geus dipahing ku pamarentah. Sakitu geus dijeblagkeun dina sepanduk yen miceun runtah di eta tempat teh henteu meunang, angger we ngarumpak kana aturan. Naha maranehna teh henteu bisa maca? Naha bodona teh bodo katotoloyo? Mun enya tea mah kitu meujeuhna we. 

Mun wijaksana mah, tangtu maranehna moal wani miceun runtah ka eta tempat. Angot geus ditetelakeun dina sepanduk anu dijieun ku Dispertasih Pemkab Bandung yen miceun runtah sambarangan teh bisa diganjar hukuman panjara salila genep bulan atawa dengda Rp 58 juta. [] Endang GG