Hari Lahir Pancasila Jadi Tradisi Anyar Kota Bandung

Bung Karno

Poe Rebo (1/6), Jalan Asia Afrika Bandung heurin ku tangtung. Lain aya demo kaom buruh. Lain aya sunatan massal deuih. Riabna jalma di dinya teh keur mapag para gegeden, nya eta mapag Presiden Republik Indonesia, Ir. Joko Widodo alias Jokowi, para pajabat ti MPR, DPR katut organisasi-organisasi lianna. Megawati Soekarnoputri oge sumping. Geus puguh Wali Kota Bandung, Ridwan Kamil alias Kang Emil, saparakanca mah. 

Tangtu bae eta para gegeden manggul maksud anu saestu. Presiden Jokowi sabalad-balad teh bade mieling Hari Lahir Pancasila jeung Pidato Bung Karno 1 Juni 1945 anu tempatna di Gedung Merdeka Bandung. Salaku tuan rumah nu bade kasumpingan presiden, geus pasti Kang Emil saparakanca kana sibukna. Tatahar ti anggalna moal boa. Alhamdulillah, acara teh lungsur-langsar. Katangen ku balarea, Kang Emil marahmay kebek ku kasugemaan. Ku kituna, kalayan tatag, Kang Emil netelakeun yen acara mieling Hari Lahir Pancasila teh bakal jadi tradisi di Kota Bandung. Malah cenah taun hareup mah acarana bakal leuwih alus, ngarah masarakat bisa leuwih mampu ngalenyepan Pancasila. 

Dina pidato anu judulna “Pancasila Ideologi Bangsaku, Gotong Royong Semangat Negeriku”, Presiden Jokowi netelakeun yen Hari Lahir Pancasila nu dipieling saban tanggal 1 Juni teh jadi Hari Libur Nasional. Pangna dikitukeun teh tangtu bae maksudna ngarah sakumna warga nagara Indonesia sadar kana pereluna ngalenyepan sarta ngamalkeun Pancasila nu jadi ideologi Negara Kesatuan Republik Indonesia.

Ku kituna, dina biantarana, Megawati Soekarnoputri salaku kulawargana Bung Karno ngahaturkeun rebu nuhun ka Presiden Jokowi. Saur Ibu Megawati, Pancasila teh lain ideologi anu bisa ngahijikeun bangsa Indonesia, tapi oge bisa jadi ideologi alternatif pikeun ngayonan pasualan dunya. Mun taya Pancasila, moal aya nu ngaranna Negara Kesatuan Republik Indonesia. Mun taya Pidato Bung Karno 1 Juni 1945, moal aya Pancasila. 

Moal boa, tiap tanggal 1 Juni, Presiden Republik Indonesia katut para gegeden lianna bakal sumping ka Bandung. Sahenteuna we, da pidatona Bung Karno nu munggaran ngeunaan lahirna Pancasila tanggal 1 Juni 1945 teh apan di Bandung.

Jadi, meujeuhna Kang Emil rek ngatradisikeun eta hari bersejarah teh. Sugan we, ku nambahna tradisi anyar, Kota Bandung tambah endah. [] Endang GG