Loba Guru Gaptek Pungak-pinguk di Hari Medsos

Hape jadul jadi pilihan guru gaptek. | sundaonline.com

Jumaah, 10 Juni teh disebut Hari Media Sosial. Ngan nu dimaksud media sosial (medsos) lebah dieu mah nya eta media sosial dina internet kayaning facebook, twitter, instagram jeung sajabana ti eta. Puguh we rame dina internet mah nu mieling Hari Media Sosial teh. Kalayan suka bungah maranehna silih ucapkeun “Selamat Hari Medsos”. Sanajan teu saeutik di antara maranehna nu kakara nyaho kana ayana Hari Medsos.

Anu tara internetan mah teu apaleun ayana Hari Medsos. “Bujeng-bujeng apal kana Hari Medsos, kana internet oge akang mah teu terang,” ceuk Pa Anang, guru SD di Kabupaten Bandung basa ngawangkong jeung sundaonline.com di hiji warung emper Jalan Panundaan Ciwidey sawatara waktu ka tukang.

“Sumuhun, sami, hehehe....” Pa Atip, guru SD di Kota Bandung oge teu apaleun kana cara ngagunakeun internet. Ku sabab kitu, hape nu digunakeunana oge hape jadul, lain hape smart phone anu bisa internetan.

Boh Pa Anang boh Pa Atip ngarumasakeun maneh jadi jalma anu gaptek (gagap teknologi). “Atuh da akang mah produk jalmi abad ka-20,” cek Pa Anang kawas nu bela diri. “Rerencangan akang di sakola oge seueur anu gaptek,” pokna deui ngabolekerkeun kanyataan.

Sanajan kitu, arinyana henteu hayang diajar ngarah bisa internetan. Jang naon cenah internetan, sakedap deui oge pangsiun. [] Endang GG