Nu Miceun Runtah ka Sisi Jalan Bakal Ditindak ku Pamarentah

Sanggeus sepanduk heubeul didudutan ku "nu gelo", 
TPS Gandasari disepandukkan deui.

Peuntaseun TPS Gandasari runtah ngalobaan. 
| sundaonline.com

Sanggeus lus-les laleungitan opat sepanduk anu napel dina pager TPS (tempat pembuangan sampah) di sisi Jalan Gandasari, Kacamatan Cangkuang, Kabupaten Bandung, Pamarentah Kabupaten Bandung masangkeun deui sepandukna. Unina dina eta sepanduk sarimbag jeung sepanduk-sepanduk samemehna, nya eta pangwawadi malar balarea teu miceun deui runtah di eta TPS, sabab eta TPS geus ditutup.

Ngaliwatan eta sepanduk, pamarentah umajak ka balarea sangkan bisa ngolah runtah ku cara 3R, nya eta reuse, reduce jeung recycle. Lian ti eta, pamarentah netelakeun, sing saha wae anu miceun runtah ka sisi jalan bakal ditibanan tindakan. Duka tindakan naon anu bakal ditibankeunana ka nu ngarempak aturan teh, da dina eta sepanduk taya kateranganana.

Ongkoh deui, teu kasawang kumaha bisana pamarentah nyangkalak jalma anu sok miceun runtah ka sisi Jalan Gandasari, da sidik apan eta tempat teh taya patugas anu ngajagana. Mun tea mah aya nu ngajagana, meureun moal beuki rea runtah di sisi jalan teh. Basa sundaonline.com ngalongok ka Jalan Gandasari, bada Jumaah (10/6), si runtah teh angger pabalatak. Peuntaseunana TPS anu geus ditutup oge ngalobaan runtah teh.

Nilik ka palebah dinya, asa ku hengker-hengker teuing nu jadi pamarentah teh. Enya hengker teu bisa ngungkulan balarea anu baredegong sok miceun wae runtah ka sisi jalan. Padahal, cek Pa Ajat, warga Jalan Gandasari, Kacamatan Cangkuang, Kabupaten Bandung, ngahunyudna runtah di sisi Jalan Gandasari teh ti taun 2013.

Duka bakal sabaraha lila eta sepanduk napelna dina pager TPS Gandasari anu geus ditutup teh. Nu pasti, eta sepanduk meh taya pangaruhna. Buktina, angger wae balarea mariceun runtahna ka dinya. Kawas nu nangtang, teu sieun ditindak ku pamarentah. [] Endang GG