Nu Tagiwur Nyakolakeun Anak

Dina PPDB 2016 loba keneh kolot anu tagiwur nyakolakeun anakna. 
| sundaonline.com/ram

Saban nyanghareupan taun ajaran anyar, loba kolot anu tagiwur, liwung, uleng jeung balueng. Bawaning ku tagiwur, cigna loba kolot anu salah tingkah alias salting tea. Geura eta Ibu Hebring—lain ngaran sabenerna, awahing ku inggis anakna teu asup ka SMP negeri, manehna salila mangtaun-taun nyengcelengan. Saban nampa duit rasiko ti salakina, ku manehna sawareh diteundeun kana cengcelengan. Salakina mah teu nyahoeun. 

Alus ari sual nyengcelenganana mah. Ngan, eta warga Kacamatan Cangkuang, Kabupaten Bandung teh boga kahariwang anu kaliwat saking. Manehna sieun anakna teu katarima di SMP negeri tea. Ku sabab kitu manehna nyengcelengan ngarah, seug dina waktuna teu katarima, bisa nyogok ka sakola. Rencana kitu teh dibejakeun ka dulurna anu dipercaya bisa nguruskeun perkara nyogok ka sakola. 

Singgetna carita, waktuna kalulusan anakna ti SD teh, cengcelenganana dipurak aya kana opat jutana. Song duit teh dibikeun ka dulurna tea pikeun nyogok ka SMP tea. Tetela, NEM anakna teh alus, malah ngaleuwihan passing grade SMP anu ditujuna. Puguh we anakna pohara atohna, pon nyakitu Ibu Hebring katut salakina. Ngan, sajeroning atoh, Ibu Hebring jadi ngahuleng. Inget kana duit opat juta anu geus dibikeun ka dulurna tea. Cek pikirna, eta duit teh weuteuh, da teu perelu dipake nyogok. Tapi barang ditanyakeun ka dulurna, eta duit teh geus euweuh, da geus dipake nyogok cenah. Buktina, budak katarima di sakola negeri. 

Puguh we Ibu Hebring jeung dulurna jadi pasea rongkah. Ibu Hebring asa ditipu ku dulurna. Ari dulurna teu suka asa dipaido ku Ibu Hebring. Ku sabab pasea, salakina Ibu Hebring jadi nyaho kana masalahna. Tapi salakina jadi ngabongan-bongan ka Ibu Hebring. Tuluy kumaha saenyana nasib duit anu opat juta teh? Duka teh teuing.

Eta kanyataan teh dicaritakeun ku Drajat, S. Pd., guru SMP Negeri 1 Cangkuang Kabupaten Bandung, ka sundaonline.com, anu maksudna ngarah jadi pieunteungeun yen jadi kolot teh ulah nepi ka kituna. Ulah pinter kabalinger. Nu kabalinger mah sok salting tea. Teu saeutik cenah jalma anu ngarti kana papagon agama, tapi dina prak-prakanana angger we sok kasak-kusuk ngahalalkeun sagala cara, kaasup dina perkara nyakolakeun anak. [] ram