Puasa Lain Ngarah Susah

Samemeh mubus kana bulan Romadon, Pa Yoga (anu ditopi) silih lubarkeun rasa sareng kadang wargina, kalebet sareng putuna (anu dikurudung). | sundaonline.com

Samemeh asup kana bulan suci Romadon, geus biasa seke-selerna Ma Eni—Ibu Maya Mulia (almarhum)—ngayakeun acara riung-mungpulung geusan kulawarga silih lubarkeun rasa, silih hampura, sangkan lancar dina ngalaksanakeun ibadah puasana. Taun ieu, Minggu, 29 Mei 2016, ngumpulna kulawarga Ma Eni teh di bumina Soenardhie Yogantara anu katelah Pa Yoga—pupuhuna Warga Peduli Lingkungan (WPL), di Jalan Bojongbuah, Katapang, Kabupaten Bandung. Mang Nanang, seniman ti Cicalengka, sarimbit, oge sumping ka eta tempat. Kulawarga anu ti Kota Bandung, ti Banjaran Kabupaten Bandung, ti Parungserab Soreang, oge hadir. 

Dina tausiyahna, boh Pa Yoga boh Mang Nanang, peupeujeuh ka nu araya di dinya—utamana ka para putra miwah para putuna—sangkan bisa mere ma’na kana bulan puasa. Ngalaksanakeun puasa teh apan ngalaksanakeun salah sahiji rukun Islam anu dasarna iman jeung takwa ka Alloh SWT tea. Jadi wajibna puasa Romadon teh pikeun umat Islam anu ariman bae. Nu henteu iman mah henteu diwajibkeun masing dina KTP-na Islam oge. 

Ku ngalaksanakeun saum Romadon nu dipamrih nya eta beuki raketna diri urang ka Alloh SWT. Hate urang beuki nyantel ka Gusti Nu Mahasuci. Teu kabita ku dunya barana. 

Kalintang salahna seug umat Islam kalah ka rumahuh dina mangsana nyanghareupan bulan Romadon. Kacida kaliruna seug kaum muslimin-muslimat kalah ka beuki moho kana dudunya. Ayana anggapan yen salila Romadon waragad kahirupan sapopoe jadi undak, eta ku lantaran balarea—umat Islam—salila ieu tacan bisa mere ma’na anu bener kana bulan suci Romadon. 

Saestuna, ku ayana bulan Romadon, ku husuna ngalaksanakeun ibadah puasa dina bulan Romadon, umat Islam anu milampah eta rukun Islam anu kaopat teh geus tangtu kana bagjana. Sacara finansial, ku ayana Romadon, rasiko sapopoe jadi irit, sabab barangdahar jadi kurang. Sacara mental, ku aturan ibadah salila Romadon, urang jadi disiplin. Ku dua hikmah Romadon sarupa kitu oge geus kajudi pibagjaeunana. [] Endang GG