Rek Lebaran, Jalan Cisabuk Butut Keneh

Bututna jalan di Cisabuk, Desa Cipelah, Kabupaten Bandung, matak seunggah nyaba lebaranan.

Jalan di Cijambe Pakidulan Cianjur oge teu eleh bututna. | sundaonline.com

Kurnia Sudrajat, S.Pd, milih jalan kota ti Pakidulan Cianjur ka Banjaran Kabupaten Bandung teh. Inyana embung make jalan Cipelah, Rancabali, Kabupaten Bandung. “Wegah via Cipelah nuju usum hujan kieu mah,” cek eta guru di Desa Sirnasari, Kacamatan Leles, Kabupaten Bandung, basa ngawangkong jeung sundaonline.com, Salasa (14/6). “Wios tebih oge, nu penting jalanna ngageleser,” pokna deui.

Cek Kurnia Sudrajat, ti Pakidulan Cianjur ka Banjaran, Kabupaten Bandung, leuwih deukeut via Rancabali. Ngan hanjakal, lebah Kampung Cisabuk, jalanna butut keneh, renjul, tarahal, pikapaureun dina usum hujan ngaririncik mah. Ari ti Sinagar nepi ka Gelaranyar mah alus jalan teh. “Eta we nu butut teh di Cisabuk,” Kurnia Sudrajat rada ngageremet.

Duka iraha pamarentah rek ngomean jalan di Cisabuk. Padahal geus mangalam-alam eta jalan teh butut. Ongkoh deui, Kampung Cisabuk, Desa Cipelah, Kacamatan Rancabali, Kabupaten Bandung teh mangrupa jalan hirup. Masarakat Kabupaten Bandung jeung Kabupaten Cianjur kalintang pereluna kana alusna jalan di eta wewengkon. Angot ayeuna keur nyanghareupan lebaran.

Cek Ibu Tati, warga Desa Cipelah, lebah dieu pamarentah kawas nu ngawilah-wilah. Ari jalan-jalan di tempat-tempat sejen dialus-alus rek nyanghareupan lebaran teh, ari jalan di Cisabuk teu ditolih.

Di Pakidulan Cianjur oge loba keneh jalan anu butut teh. Upama ditataan mah matak cape nataanana bawaning ku loba. Intina, cek Kurnia Sudrajat, pamarentah kudu leuwih telik malire kana pangabutuh rahayatna. Geura cobi longokkan sakali wae mah. Upamana lelewek Cijambe nu aya di antara Cigadog jeung Ciburang. Jalan di dinya mah teu sirikna wahangan saat. Batu teh sagede-gede hulu munding. Tada teuing matak kaluronna seug disorang make kandaraan ku nu keur kakandungan mah. Tapi, geus mangalam-alam, pamarentah kawas nu meungpeun carang. “Matak seunggah di jalanna ari kudu lebaranan ka nu jauh teh,” Kurnia Sudrajat bangun nu hanjelu. [] Endang GG