Ridwan Kamil Mere ‘Cap Jempol’ ka nu Milih Sakola Swasta

Basa Kang Emil ngajelaskeun PPDB 2016 ka para wartawan di Hotel Grand Royal Panghegar Bandung.
 | sundaonline.com 

Basa biantara dina acara “Sosialisasi dan Penguatan Peraturan Wali Kota (Perwal) tentang Penerimaan Peserta Didik Baru (PPDB) 2016” di Hotel Grand Royal Panghegar Bandung, Kemis, 26 Mei 2016, Wali Kota Bandung, Ridwan Kamil alias Kang Emil nembongkeun kareueusna ku alatan di Kota Bandung loba sakola swasta anu hade kualitasna. Ku kituna, Kang Emil baris mere cap jempol—ngaapresiasi—ka warga Kota Bandung anu milih sakola swasta. “Di Kota Bandung, seueur sakola swasta anu sae,” saurna kalayan tandes.

Kanyataanana, numutkeun informasi anu dikumpulkeun ku sundaonline.com, teu saeutik barudak anu langsung milih sakola swasta. Di Kota Bandung loba sakola swasta anu kualitas atikanana mapakan—malah ngaleuwihan—sakola negeri. Basa toilet di sakola-sakola negeri masih pikarujiteun, toilet di sababaraha sakola swasta di Kota Bandung malah geus kawas toilet di hotel berbintang. Pon nyakitu dina patamananana. Eta teh ciciren kamajuan hiji sakola. 

Basa ngaresmikeun toilet jeung taman SMA Negeri 20 Bandung, Kang Emil oge netelakeun yen toilet anu alus tur beresih kawas di hotel berbintang teh ciciren kana ayana peradaban umat manusa. Geus tangtu, dina peradaban teh nyangkaruk sistim atikan anu hade. 

Wilujeng ka adi-adi anu tos milih sakola swasta. Mugia cita-cita hidep tinekanan. [] ram