Saban Puasa Dor-Dar Petasan

Pangwawadi dina eta sepanduk meh teu dipalire ku balarea.

Loba kolot nu mujuhkeun anakna kana maen petasan. 
| sundaonline.com

Sarengsena Wali Kota Bandung, Ridwan Kamil, biantara dina acara Sosialiasi PPDB 2016, di Hotel Panghegar Bandung, Kemis (26/5), kuring tumanya ka anjeunna,“Kang, dina sasih saum taun ieu, naha tiasa dipastikeun Kota Bandung bebas petasan?”

Kang Emil—nenehna Ridwan Kamil—pondok pisan ngawalerna. “Mudah-mudahan,” cenah. Sanajan kuring teu sugema ku jawaban nu ngan sauted kitu, tapi dina mangsana bulan Romadon mah kaharti pisan eta jawaban teh, sabab tetela, di wewengkon kuring mah, bada tarawehan poe kahiji oge geus kadenge tingbeledugna sora petasan.

Duka kumaha mimitina saban asup kana bulan Romadon sok usum petasan. Padahal, saur para ulama, tetela mudorotna. Dina media massa remen kacaturkeun petasan mawa mamala ka balarea. Anehna, aparat meh teu walakaya ngayonanana. Nu jaradi kolot sarua deuih teu bisa majar kumaha. Ku kituna barudak beuki jongjon maraen petasan di buruan imahna, di hareupeun imah batur, di sisi jalan, atawa malah di gang mah di jajalaneun pisan. Poe Jumaah (10/6) isuk-isuk, di Jalan Kebonmanggu, Kota Bandung, kuring mireungeuh aya bubuk kertas pabalatak urut barudak maraen petasan. Di Kabupaten Bandung sarua deuih. Barudak nu maraen petasan kawas nu teu beunang dipondah. Kawas nu kajadian di perumahan Sanggar Indah Banjaran. Saban bada tarawehan, saban bada kuliah subuh, saban ngabuburit, barudak maraen petasan. Puguh we gandeng ku sorana anu tingbeledug pikareuwaseun.

Ketang, pangna barudak nepi ka moho kana petasan teh da ku kolotna dipupujuhkeun. Enya teu sauetik kolot nu mupujuhkeun anak-anakna maen petasan. Tilu taun ka tukang, kuring kungsi motret hiji bapa anu keur meuli petasan di Pasar Cijerah. Padahal, geus kurang kumaha pangwawadi ti pamarentah mah. Dina bulan puasa dua taun ka tukang oge kuring kungsi motret sepanduk anu unina pangwawadi ti Kapolres Bandung jeung Ketua Majelis Ulama Indonesia (MUI) Kabupaten Bandung, sangkan masarakat henteu maen petasan. Tapi eta pangwawadi teh kawas taya pangaruhna. Angger we barudak teh maraen petasan.

Antukna, samemeh bulan puasa mangkukna, kuring datang ka Polres Bandung anu teu pati jauh ti Sanggar Indah Banjaran. Ngahaja datang ka bagean humasna, rek menta pandangan ti nu jadi aparat kapulisian. Ari pek, cek salah saurang pulisi (lalaki) nu aya di rohangan humas, petasan nu usum dina bulan puasa mah petasan cengek anu henteu pibahayaeun. Kuring kerung ngadenge katerangan kitu teh. Enya, naha petasan bet disebut henteu pibahayaeun? Apan sidik remen kabejakeun anu cilaka ku alatan maen petasan atawa nyieunan petasan....

Ongkoh deui pikeun anu ngarandapan kasakit mah ngabeledugna sora petasan teh matak pikareuwaseun. Ibu Jamilah, 73 taun, warga Sanggar Indah Banjaran, Kabupaten Bandung, remen anpal panyawat sesekna upami ngadangu sora atawa iber anu matak pikareuwaseun. Angot sora petasan. Incuna mah, Salma, 4 taun, kuat ka soak upama ngadenge sora petasan teh. Jadi, saurna, asa aneh seug petasan nu sok dipake ulin ku barudak disebut teu pibahayaeun.

Hadena, Ibu Jamilah netelakeun, aparat daerah sareng kapulisian ngayakeun razia petasan. Ngaraziana tong ka pasar-pasar wungkul, tapi oge ka saban imah warga. Lian ti kitu, para ustadz oge ulah petot-petot peupeujeuh sangkan santri-santrina henteu maraen petasan, sabab petasan bisa mawa mamala pikeun balarea. [] Endang GG