Sikat Kawat, Ubar Sariawan jeung Nyeri Huntu

A. M. Isran, BSC, MBA, PhD

Sasih saum sok usum kasakit panas dalam sareng sariawan. Malah, tina sariawan, aya nu cigna kana nyeri waos. Upami tea aya baraya sundaonline.com anu nandangan sapertos kitu, teu kedah hariwang. Cobian geura disikat kawat! Sumuhun disikat kawat. Eta istilah teh dicetuskeun ku A. M. Isran, BSC, MBA, PhD, nya eta urang Sunda Besar anu mendakan eta elmu kasehatan. Anjeunna oge kasohor ahli Pijat Getar Syaraf sareng penemu Senam Perkasa Indonesia anu kiwari kakoncara tug ka mancanagara. 

Saestuna, sikat kawat mah ukur sesebutan. Nyatana mah disikat kawat teh ditojosan ku tusuk gigi anu dijieun tina kai atawa awi. Anu ditojosan teh gugusina. Kantenan we ku ditojosan teh bakal bijil getih kotor tina sela-sela waos. Kumaha kersa nyobian ditojosan ku tusuk gigi? Ieu cara teh kawilang efektif. A. M. Isran mendakan eta cara sabada nalungtik salami opat taun. Pangna ngayakeun pananglutikan teh wireh anjeunna salami mangtaun-taun ngarandapan sariawan sareng nyeri waos teu damang-damang. Padahal tos ditarekahan ku rupi-rupi ubar, boh ubar medis boh ubar alternatif sanesna. 

Lian ti ditojosan ku tusuk gigi, baraya oge tiasa ngagunakeun sikat gigi. Tapi tong nganggo odol. Saena sikat gigi anu heuras. Digosokkeunana sing tarik, tug ka baloboran getih tina gusi—sela-sela waos. Cara kieu oge efektif ngubaran sariawan sareng nyeri waos. Geura cobi laksanakeun saban enjing-enjing samemeh sasarap. Sawios dugi ka babalongkengan atanapi utah uger oge. Etang-etang digurah we. Da atosna teh ngemplong. Boh di mulut boh di perut bakal pada-pada enakeun karaosna. Teu percanten? Mending oge buktoskeun ku nyalira. Supados apdol! [] Baba