Balarea Maen Pokemon Go, Ahok Teu Kabawakeun

Ahok apal kana mohona balarea kana Pokemon Go, ngan inyana sarimbit teu kabawakeun.

Hira keur muru Pokemon di kantorna Kang Emil.

Pokemon Go geus ngageunjleungkeun jeung ngabarubahkeun. Ti mimiti jebulna, tanggal 6 Juli 2016, tug ka wangkid ieu, eta kaulinan online anu diciptakeun ku John Hanke teh pohara dipikaresepna ku balarea. Barudak nepi ka kolot-kolotna maraen Pokemon Go. Pangna dipikaresep teh dumeh maen Pokemon Go mah bari wara-wiri ka ditu ka dieu, teu bari cimekblek numpi di kamar. Wakil Presiden, Jusuf Kalla, oge bangun nu bungah nyaritakeun incuna anu lulumpatan ngudag-ngudag monster Pokemon. 

“Ayeuna mah Aa oge janten sumanget upami diajak ka mana-mana teh,” cek Teh Risma, warga Desa Nagrak, Kacamatan Cangkuang, Kabupaten Bandung, nyaritakeun salakina, Aa Hira, ka sundaonline.com. Biasana, salakina Teh Risma anu sapopoena ngajar multimedia di SMK, Ciwidey, Kabupaten Bandung, langka ka mana-mana ari mulang ti pagaweanana teh. Ti saprak aya Pokemon Go, jadi resep aprak-aprakan. Malah, basa pere sakola mah, ngaprakna nepi tempat-tempat pangulinan di Kota Bandung. Hikmahna, Teh Risma katut salakina jadi apal ka kantorna Walikota Bandung, Ridwan Kamil alias Kang Emil. Atuh, dina instagram teh, kalayan kebek ku kabungah, Teh Risma nulis—bebeja ka Kang Emil yen salakina aya di kantorna Kang Emil keur muru monster Pokemon.

Di patamanan balarea anteng maraen Pokemon Go.

Loba kolot anu ngarasa reugreug ku ayana Pokemon Go teh, sabab anak-anakna anu tuman numpi wae di kamar jadi daraek ngencar. Saur Jusuf Kalla mah, alus ku ayana Pokemon Go teh, barudak jadi daraek milampah interaksi sosial. 

Gubernur DKI Jakarta, Basuki Tjahaja Purnama alias Ahok, oge nyebutkeun ayana pangaruh hade tina Pokemon Go. Ku ayana Pokemon Go, tempat-tempat wisata jadi rame didongdon ku balarea. “Di Monas oge loba pisan monster Pokemon teh,” cek Ahok. Sanajan kitu, Ahok netelakeun, dirina katut kulawargana mah teu pipilueun maen Pokemon Go.

Lain Ahok sarimbit bae ketang. Nadine, budak kelas lima SD Negeri Ciluncat I, Kacamatan Cangkuang, Kabupaten Bandung, oge teu kabitaeun maen Pokemon Go. Pokna teh, ukur miceunan waktu, teu ngahasilkeun duit. [] ram