Coco Fanda Nanjeurkeun Budaya Sunda

Tari Sunda dina GeFest ka-19.

Pamilon Pasanggiri Mojang Jajaka dina GeFest ka-19.

Budaya Sunda moal tumpur salila aya keneh urang Sunda anu ngamumulena. Ramalan para inohong anu netelakeun yen taun 2040 basa Sunda bakal sirna moal kajadian salila aya keneh urang Sunda anu make kana budayana. Insya Alloh, budaya Sunda bakal terus nanjeur, sanajan kiwari cek itungan mah ngan saeutik urang Tatar Sunda anu nyunda teh. Tapi, keun wae saeutik oge, nu penting kualitasna. Sugan tina nu saeutik teh ngarekahan jumlahna. Nu utama, kiwari aya keneh urang Sunda anu paduli kana kahirupanana Ki Sunda. Ku kituna, ulah leutik hate, urang kudu gede hate.

Ayana Rebo Nyunda anu diluluguan ku Ridwan Kamil alias Kang Emil, Walikota Bandung, geus sapayusna ngagedean hate urang. Ku ayana Rebo Nyunda, masarakat Kota Bandung piraku nepi ka henteu kabawakeun nyunda. Geura tingali SMA Angkasa Lanud Husein Sastranegara Bandung. Sanajan atikan di ieu sakola make atikan militer, tapi SMA Angkasa Lanud Husein Sastranegara Bandung anu kawengku ku Yayasan Ardhya Garini pohara mohona kana budaya Sunda. “Saban aya kagiatan penting sapertos acara paturay tineung atanapi perpisahan, pelantikan pramuka, pembukaan akreditasi, sareng sajabina, tangtos nganggo upacara adat Sunda,” saur Kepala SMA Angkasa Lanud Husein Sastranegara Bandung, Dra. Hj. Mimi Maryati, M.Si, basa ngawangkong jeung sundaonline.com di kantorna, Jalan Lettu Subagio No. 22 Bandung, sawatara waktu kaliwat.

Ngagedurna sumanget kasundaan di SMA Angkasa Lanud Husein Sastranegara Bandung lain di lingkungan guru-guruna wungkul. Barudak SMA Angkasa Lanud Husein Sastranegara Bandung oge kacida sumangetna ari rek mintonkeun budaya Sunda teh. Salah sahijina nya eta waktu ngayakeun GeFest ka-19 dina bulan Mei 2016. 

Saur Hj. Mimi Maryati anu disarengan ku Guru Seni Budaya jeung Prakarya, Septian Nurfatoni, S.Pd, miwah Guru Olah Raga, Hadi Mulyadi, S.Pd, GeFest teh kancahan tina GRESSA Festival. Ari GRESSA kancahan tina Gelar Kreativitas Seni Siswa Angkasa. Nu pikareueuseun dina GeFest ka-19 nya eta ku ayana tema Coco Fanda. Eta tema teh dialpukahan ku barudak OSIS. Coco Fanda oge mangrupa kancahan tina Colourful Combine Fantastic Nyunda. 

Rengrengan SMA Angkasa Lanud Husein Sastranegara Bandung anu nyunda.

Colourful hartina warna-warni. Pangna disebut kitu, dina GeFest aya rupa-rupa pintonan kayaning pasanggiri band, mojang jajaka, fashion show, ngalukis, ngawarnaan, nyusun puzzle, ngarakit pesawat, rampak sekar, pameran jeung bazaar. Ari Combine hartina ngadumaniskeun kamoderenan jeung kasundaan. Fantastic hartina luar biasa, sabab ieu acara kacida rongkah jeung rohakana. Tah, Nyunda mah hartina sakumna warga SMA Angkasa Lanud Husein Sastranegara Bandung geus gilig pikeun nanjeurkeun budaya Sunda. Ku sabab kitu, Tari Merak, Jaipongan, Tari Mojang Priangan, Pidato make basa Sunda, carita rahayat saperti Sangkuriang, Kaulinan Urang Lembur, jeung kasenian Sunda sejenna, aya dina GeFest ka-19. Malahan mah, acara kabaret anu dipintonkeun ku barudak SMA Angkasa Lanud Husein Sastranegara Bandung oge eusina mangrupa pangwawadi sangkan urang milu aub ngamumule budaya Sunda.

Dra. Hj. Mimi Maryati, M.Si

Alhamdulillah, Coco Fanda dina GeFest ka-19 meunang pangajen anu hade ti balarea. Malahan mah, Kepala Bidang PSMAK Disdik Kota Bandung, Dra. Hj. Rita Hardyani, M.Ed, anu ngaluuhan eta acara oge ngacungkeun jempolna tandaning reueus kana kamonesan jeung kamotekaran barudak SMA Angkasa Lanud Husein Sastranegara Bandung.

“Engke oge, insya Alloh, aya deui upacara adat Sunda,” saur Hj. Mimi Maryati ngungkabkeun deui kareueusna. [] ram