Deukeut ka Pamarentah Can Karuhan Genah

Jalan longsor di Sanggar Indah Banjaran kaluli-luli.| sundaonline.com

Urang Kampung Cisabuk, Desa Cipelah, Kacamatan Rancabali, Kabupaten Bandung, sok kawas nu timburu ka urang Soreang jeung sabudeureunana teh. Pajarkeun teh genah urang Soreang jeung sabudeureunana mah. Genahna deukeut ka pusat pamarentahan. Deukeut ka Bupati. Jadi, upama menta bantuan teh gampang. Beda jeung urang Kampung Cisabuk. Abong jauh ka pusat pamarentahan, jalan ruksak geus mangalam-alam oge tacan dipirosea bae ku pamarentah teh. “Ti jaman abdi sakola keneh di SD dugi ka ayeuna pun incu tos sakola di SD, ih, angger we jalan di dieu mah butut,” cek Ibu Tati, warga Desa Cipelah, basa ngawangkong jeung sundaonline.com. 

Padahal eta omongan urang Cisabuk teh can karuhan bener saratus persen. Da buktina, sanajan deukeut ka pusat pamarentahan, warga Sanggar Indah Banjaran Kabupaten Bandung hese hayang meunang bantuan ti pamarentah teh. Tingali we, jalan longsor di lingkungan RT 01 RW 06, Desa Nagrak, Kacamatan Cangkuang, Kabupaten Bandung, nepi ka danget ieu tacan kaomean. Padahal longsor teh kajadianana geus kaitung lila. “Ti waktos aya angin puyuh tea we,” cek Drajat, salahsaurang warga anu jadi sekretaris dina kapanitiaan perbaikan jalan. 

Diitung-itung mah aya kana Rp 30 jutaan pikeun ngomean jalan nu ruksak akibat longsor teh. Legana jalan omeaneun kurang leuwih 50 meter pasagi. Cek Drajat, panitia kungsi ngahiap warga pikeun ngomean jalan sacara swadaya. Hasilna, alhamdulillah warga teh giak mere tanggapan anu hade. Malah aya sawatara warga anu geus nyumbang semen, keusik jeung sajabana. Tapi tarekah swadaya teh teu kebat, sabab aya erongan bakal meunang bantuan ti pamarentah desa. “Mung duka iraha,” pokna ka sundaonline.com. [] ram