Elite Force SMA Angkasa Lanud Husein Sastranegara Bandung Juara Paskibra

Elite Force SMA Angkasa Lanud Husein Sastranegara Bandung

Imel Melinda Bachtiar

Imel Melinda Bachtiar mani kebek ku kareueus basa nyaritakeun ekskul Paskibra teh. Atuh da Elite Force—ngaran ekskul Paskibra di SMA Angkasa Lanud Husein Sastranegara Bandung—taun ieu geus nyangking rupa-rupa kajuaraan, di antarana Juara II dina kejuaraan Paskibra di SMK IB (Persib), Juara Utama III jeung Juara Variasi Formasi Terbaik II di Balai Kota, sarta Juara Madya III jeung Juara Bina II dina Brigantara Event II di SMK Negeri 12 Bandung.

“Kantenan taun kamari mah,” Imel anu dipercaya jadi Katua Elite Forces teh rada ngelemes. Sabab, cek Imel, dina taun 2015 mah SMA Angkasa Lanud Husein Sastranegara Bandung nyangking Juara Umum, Juara Utama I, Juara Variasi Formasi Terbaik I jeung Juara PBB Murni Terbaik I, dina Brigantara Event I di SMK Negeri 12 Bandung.

Bisana jadi juara teh, cek Imel, buah tina kakeyeng barudak Elite Forces, diwuwuh ku apingan palatihna, Muhammad Syahrul Ramdan Alih. Saban poe Rebo jeung Saptu, ti tabuh 13.20 nepi ka tabuh 16.00, barudak Elite Force ngalaksanakeun latihan Paskibra di sakola. “Tapi, upami bade mayunan lomba mah, latihanana saban dinten,” Imel anu cita-citana jadi pulisi atawa tentara teh ngajentrekeun ka sundaonline.com di sakolana, sawatara waktu ka tukang. [] ram