Geus Lebaran Tong Maksiat Deui

Hiji bapa mangmeulikeun petasan jeung kembang api pikeun anakna di Pasar Cijerah. Conto kamaksiatan dina kahirupan umat Islam. | sundaonline.com

Bakal datang hiji jaman anu dina eta jaman umat manusa moal bisa hirup upama teu milampah kamaksiatan. Eta kasauran Kangjeng Nabi teh diguar ku Ustadz Fariz Rizki Ramdhani dina khutbah Idul Fitri 1437 Hijriah, di Lapangan Merdeka, Sanggar Indah Banjaran, Kabupaten Bandung, Rebo, 6 Juli 2016. 

Para sahabat tumaros ka Kangjeng Nabi, “Upami kitu, abdi sadayana kedah kumaha?”

Kangjeng Nabi ngadawuh,” Aranjeun kudu hijrah.”

Ustadz Fariz netelakeun, eta jaman anu disaurkeun ku Kangjeng Nabi teh geus datang. Kiwari urang geus aya dina eta jaman. Ayeuna, kari ketak urang rek kumaha, ngigelan eta jaman dina harti milu motah dina kamaksiatan, atawa hijrah tea, demi Alloh, ninggalkeun kamaksiatan. 

Cirining urang aya dina eta jaman, Ustadz Fariz ngagambarkeun, kabuktian kiwari loba umat Islam anu milampah kamaksiatan dina bulan suci Romadon. Salah sahijina petasan jeung kembang api. Loba kolot anu ngantepkeun anak-anakna maen petasan jeung kembang api sabada tarawehan. Malah tempona takbiran, sapeupeuting kolot jeung barudak giak nyareungeut petasan jeung kembang api anu pajarkeun teh cenah merayakan kemenangan. “Padahal, Islam teu ngajarkeun hal sarupa kitu,” cek Ustadz Fariz. 

Nyeungeut petasan jeung kembang api lain ajaran Islam. Peta sarupa kitu geus sidik maksiatna, geus sidik ngadoreksakeunana ka balarea. Anu nyeungeut petasan geus teu boga rasa kamanusaan. Manehna ngabaekeun sanajan sora petasan dor-dar tingbeledag ngareuwaskeun jajantung tatanggana anu keur nyorang kasakit. 

Ustadz Fariz oge nembrakkeun kanyataan yen kiwari loba salaki anu hengker, sieun ku pamajikan. Padahal, Islam ngajarkeun, salaki teh kudu jadi imam alias pamingpin anu bisa nungtun-nuyun pamajikan katut anak-anakna kana jalan anu dipikarido ku Alloh. Balukar tina kahengkeran kaom lalaki, nu jadi pamajikan cur-cir ngutuh-ngetah salakina, tug ka salakina daek dikuyah-keuyeuh sanajan kudu milampah dosa kayaning korupsi jeung samodelna. Loba barudak anu campelak ka kolot, garoreng ahlak, ku alatan bapana teu bisa mingpin kulawargana. 

Eta teh sabagaen tina conto kahirupan anu maksiat. Ku kituna, dina momen Idul Fitri, geus sakuduna umat Islam babalik pikir, milampah hijrah tea, nya eta ninggalkeun kahirupan anu maksiat. [] ram