Kahanjelu ti Pangojayan

Dina teteceanana, eta pangojayan teh bala ku runtah. 

Caina kotor, ubinna ledeg. | sundaonline.com

Saban lebaran barudak sok nagih ulin ka pangojayan. Ku sabab keur nganjang ka pun biang, nya antukna mah muru ka Cikalapa, pangojayan anu pernahna di Kacamatan Cangkuang, Kabupaten Bandung. Milih eta tempat ngojay teh lain ku pedah deukeut ti bumina pun biang. Intina mah dumeh kuring hayang nedunan jangji ka barudak. Ongkoh deui, cek alo kuring, suasana di eta pangojayan teh pikabetaheun. Alhamdulillah, sajaba ti dua anak kuring, lanceuk-lanceuk kuring katut anak-anakna oge miluan. 

Bring, poe Saptu, 9 Juli 2016, pasosore kuring saparakanca ngabring laleumpang muru Cikalapa mapay-mapay Jalan Cijalupang. Ukur memenitan, kuring saparakanca geus nepi ka Cikalapa. Barang gok di hareupeun panto gerbangna, katangen pangojayan teh geus teu pati rame. Atuh puguh we pikeun kuring saparakanca mah atoh, sabab tempona ngojay teh jadi laluasa. Angot barudak mah teu sirikna ajrag-ajragan kakara nepi di panto gerbang teh, sabab ku maranehna katempo aya pangulinan anu dipikaresepna, nya eta sawatara sosorodotan jeung cai bahe tina ember gede.

Mayar asupna teh Rp 15 rebu saurangna. Budak umur dua taun oge kudu mayar. Kuring meuli karcis pikeun sabelas urangeun. 

Ngan hate dumadakan ngaleketey sanggeusna aya di jero pangojayan teh. Atuh da geuning di jerona mah eta pangojayan teh pikarujiteun. Barala ku runtah jeung jareblog ku tapak sapatu jeung sendal para pangunjung anu lalar-liwat. Kahayang mah geuwat balik deui we. Ngan, abong barudak, sanajan rarujit oge, maranehna sarumanget nempo cai teh hayang geuwat-geuwat guyang. 

Pangojayan nepi ka bala ku runtah jeung kotor teh ku sabab pangunjungna 
teu disiplin, diwuwuh ku patugasna anu taledor. 

Eleh deet, kuring jeung lanceuk kuring ancrub kana cai, ngaping barudak anu masih lalemet keneh. Teu make kacamata oge katenjo cai kolam teh kotor. Ubinna ledeg. Runtah urut kadaharan oge milu ngambang dina kolam. Cacakan kitu, barudak mah kaciri galumbirana. Maranehna bangun taya kacape ulin sosorodotan dina kolam bari ngadago-dago cai bahe tina ember tea. Beres tina sosorodotan anu tengah, soloyong barudak teh muru sosorodotan anu di ujung. Kuring jeung lanceuk kuring nutur-nutur maranehna. Ngan, barang gok di luhureun sosorodotan anu di ujung, dumadakan kuring ngurel, sabab nempo utah ambarayah dina eta sosorotan. Geuwat ku kuring barudak teh dihuit, ulah jadi sosorodotan di dinya. 

Teu lila deui, barudak teh ku kuring dibawa hanjat. Kuring saparakanca geuwat tatahar rek kaluar ti eta pangojayan, rek mulang deui ka bumina pun biang, mawa kahanjelu ti pangojayan. Kaciri, alo kuring anu ngajak ka eta pangojayan, taarna kerung. Aneh cenah, naha dina suasana lebaran mah eta pangojayan teh jadi pikarujiteun. [] Firman Setianugraha