Koneng Bodas, Ubar Rupa-rupa Panyakit

Koneng bodas | sundaonline.com

Ibu Ai Ratnasih | sundaonline.com

Ibu Ai Ratnasih (69) pohara bingahna. Ayeuna mah mirasa deui ari tuang teh, malah tiasa deui nuang anu lada-lada, da panyawat lambungna tos damang. Lian ti kitu, vertigona tara kanceuh deui. Pon nyakitu pegel linu sareng sabangsana. Cindekna mah, Enin—landihanana Ibu Ai Ratnasih—jagjag waringkas deui salirana. “Eta teh ti saprak Enin ngaleueut koneng bodas,” saurna ka sundaonline.com di Sanggar Indah Banjaran, Kabupaten Bandung, sawatara waktu kaliwat. 

Enin ngawitan ngaraos hasiatna sabada tilu kali ngaleueut koneng bodas. Tiap enjing-enjing, samemeh sarapan, Enin ngaleueut sagelas koneng bodas. “Ngan sing kentel koneng bodasna, ulah cawerang,” Enin ngajentrekeun.

Ngarah teu cawerang, kanggo sagelaseun teh koneng bodasna sing cekap, kinten-kinten dua jempol panangan jalmi dewasa. Teu nanaon langkung ti kitu oge, ngan ulah dikirangan. Cara ngolahna, koneng bodas teh dikumbah sing beresih. Kulitna dipesek mangga, henteu oge teu nanaon. Tos beresih, koneng bodas teh diparud. Hasil parudanana diwadahan kana mangkok, teras ditinyuh ku cai panas satengah atawa tilu parapat gelas. Diaduk sakedap. Teras disaring ku panyaringan enteh kana gelas. Hampasna diperes dugi ka sepa dina panyaringan. Tos kitu mah mangga dileueut haneut-haneut. Rasana peuheur, tapi si peuheurna kasilep ku rasa mentol. 

Saena mah, mun tos ngaleueut koneng bodas, ulah langsung barangtuang. Wayahna we balem heula salami minimal 15 menit mah. Ngarah koneng bodasna nyerep heula kana awak urang. 

“Nu karaos ku abdi mah, lian ti raos kana lambung teh, kana kahampangan oge janten lancar,” saur Ibu Umayah (48), tatanggina Enin. Pokona mah hebat hasiatna koneng bodas teh. “Mung hiji we masalahna teh, sok hoream marudna,” saurna deui bari ngaheheh.

Numutkeun katerangan ahli herbal mah, hasiatna koneng bodas kangge rupi-rupi panyawat. Diantawisna, sajabi ti ngubaran panyawat maag atanapi nyeri lambung, koneng bodas sae kanggo ngalandongan nyeri patuangan, nyeri nalika haid, lebet angin, kulit memar akibat tatu, kanker, tumor, asma atanapi sesek, ngurel, ngagetih, karacunan obat-obatan kimiawi, oge sae kanggo nyegah kareksakan gen, cocok kanggo anu nuju diet margi tiasa nurunkeun berat badan, ngalancarkeun kahampangan, ngarangsang produksi sel darah merah, matak seger kana kulit tur nyegah timbulna jarawat, sareng sumber anti oksidan alami.   

Pokona aheng koneng bodas mah. Ongkoh koneng, tapi bodas. [] ram