Moho kana Pokemon Go, Poho kana Tatakrama

Nu teu panuju kana game Pokemon Go oge loba. Wakil Ketua Komisi I DPR RI, Tantowi Yahya, nyebutkeun yen Pokemon Go mere pangaruh anu goreng pikeun kahirupan masarakat, utamana kana tingkah polahna. Buktina apan katempo ku balarea, kiwari di jalan raya loba sapedah motor anu alon majuna, tuluy eureun-eureunan tiap sababaraha meter bari ngadadak ngaremna, da moho tea kana Pokemon Go. Kitu peta teh sarua jeung nyiar-nyiar picilakaeun. Malah, di Amerika geus kabejakeun ayana mobil anu cilaka alatan si supirna sibuk ngudag-ngudag Pokemon. 

Kepala Divisi Humas Polri Irjen Pol Boy Rafli Amar oge mangpaurkeun kana ayana pengendara motor anu bari maen Pokemon Go. “Perkara balarea tumplek maraen Pokemon Go di ruang publik mah mangga teh teuing, ngan hiji we nu kedah diperhatoskeun teh, ulah maen Pokemon Go nalika nuju nyupiran kandaraan di jalan raya,” cek Irjen Pol Boy Rafli Amar.

Ku kituna, pamarentah ngaliwatan Menteri Komunikasi dan Informatika, Rudi Rudiantara, moal asa-asa pikeun ngablokir Pokemon Go saupama eta game enyaan mawa mamala ka balarea. Tapi eta sikep pamarentah teh geuwat dibantah ku pengamat keamanan cyber, Pratama Persadha. “Pamarentah moal bisa ngablokir kitu wae,” pokna. “Soal ngablokir mah apan aya payung hukum, Permen 19 taun 2014, anu ngatur ngeunaan situs bermasalah anu eusina radikalisme, pornografi jeung SARA. Ku kituna kedah ditingal heula, lebah mana salahna Pokemon Go,” pokna deui ngajentrekeun.

Nu tangtu, saur Ibu Djamilah (73), warga Desa Nagrak, Kacamatan Cangkuang, Kabupaten Bandung, ku ayana Pokemon Go, barudak beuki malaweung. Diajak nyarita balangah. Digeroan teu ngawaro. Panggih di jalan teu seuri-seuri acan, jajauheun nepi ka nanya atawa sasalaman mah. Pokona barudak teh jadi degig. “Kituna teh ti saprak maranehna marake hape,” eta pangsiunan guru agama teh ngajentrekeun ka sundaonline.com. “Kantenan ayeuna aya Pokemon Go. Sakalieun indung hoyong dibaturan oge mani taya saurang-urang acan anu datang, da maranehna sibuk ngaping anak-anakna anu keur ulin ngabeberik Pokemon di luar,” pokna deui kebek ku kahanjelu. 

Saur Ibu Djamilah, tatakrama beuki kaluli-luli ku ayana Pokemon Go, boh tatakrama anak ka kolot, boh tatakrama balarea di jalan raya. [] ram