Olivia “Bunuh Diri”, Angkasa Kabaret Juara Sa-Jawa Barat

Barudak Angkasa Kabaret

Intan Nur Rizki jeung Yuliani Rosita

Liverpool jeung The Beatles pohara pikatajieunana, tug ka Olivia Jensen Suprihatin mah teu sirikna kagegeloan. Manehna kacida fanatikna. Beurang peuting Liverpool jeung The Beatles ebreh dina lamunanana. Pangrasana Olivia mah Liverpool jeung The Beatles teh nyata dina kahirupanana. Ku sabab tetela lamunan teh ukur lamunan, antukna Olivia frustrasi nepi ka gelona jeung bunuh diri.

Eta carita di luhur teh sinopsisna carita Fanaticism Liverpool anu dicaritakeun ku Intan Nur Rizki jeung Yuliani Rosita, barudak anu aktip dina ekskul Angkasa Kabaret di SMA Angkasa Lanud Husein Sastranegara Bandung, ka sundaonline.com, sawatara waktu kaliwat. 

Harita, Fanaticism Liverpool dipentaskeun ku barudak Angkasa Kabaret dina lomba kabaret anu ngangkat tema English Festival, di Kampus Universitas Islam Nusantara (Uninus) Bandung, taun 2015. Ngan, nu kabagean jadi tokoh mah Anissa Nur Habibah. 

Alhamdulillah, cek Yuliani Rosita, dina eta lomba teh Angkasa Kabaret kapeto jadi juara I sa-Jawa Barat, best actress, best story line, best mixingan, best sutradara jeung juara favorit.

Yuliani Rosita jeung Intan Nur Rizki netelakeun, juara teh buahna tina latihan anu konsisten, disiplin jeung kompakna tim. “Upami bade mayunan lomba, barudak latihanana saban dinten Salasa, Kemis sareng Saptu, tabuh dua siang dugi ka tabuh opat sonten. Tapi upami teu aya lomba mah latihan mung dinten Kemis wungkul,” cek Yuliani anu dihaminan ku Intan.

Fanaticism Liverpool teh karangan Didit Miladi NH anu ngarangkep jadi palatih jeung sutradarana barudak Angkasa Kabaret. Lian ti Pa Didit, nu ngaping Angkasa Kabaret teh Ibu Nelly Herliana, S.Pd. Ari nu maraen dina Fanaticism Liverpool mah nya eta Anissa Nur Habibah, Giri Ramadhan, Yuliani Rosita, Intan Nur Rizki, Krisna Wahyuni, Muhammad Rizal Fahmi, Wira Buana, Rudi Aditya P, M. Andhika, Renti Nur Oktaviani, Faza Najmi, Sarah Anisa, Vinna Purnama, Regita, Dinda Yunita, Nada Helfika, Putri Dwi, Noni Astuti, Indri, Ayu Octaviani jeung Ugi. [] ram