Pokemon, Monster nu Pikaresepeun?

John Hanke nyiapkeun Pokemon Go salila 20 taun.

Sanajan Pokemon Go kakara dirilis tanggal 6 Juli 2016, pikeun kuring mah teu aneh, da nu ngaranna Pokemon mah geus aya ti taun 1996 mula. Harita mah Pokemon teh pilem karton. Kawas barudak sejenna, anak-anak kuring kacida resepeunana lalajo pilem Pokemon. Bawaning ku lobana nu mikaresep, gambar Pokemon nu dijual di hareupeun sakola marema. Ti mimiti stikerna nepi ka baju, calana, kaos kaki, sapatu, tas, jeung nu lianna nu digambaran Pokemon laris. Angot bonekana mah. 

Kuring oge milu reueus basa barudak raresepeun kana pokemon teh. Reueus ka nu ngarangna, boh ka nu ngarang caritana, boh ka nu ngagambarna. Apan nu ngarang Pokemon teh urang Jepang. Kosaku Anakubo ngaranna. Pokemon diwangun dina carita komik nu dimuat dina Majalah Coro Coro Comic anu diterbitkeun ku Shogakukan. Enya milu reueus teh dumeh pangarangna geus jadi pangarang anu sukses, kakoncara di sakuliah dunya. Angot kiwari jebul Pokemon Go. Sanajan Pokemon Go mangrupa alpukahna John Hanke, tapi sahenteuna ngaran Kosaku Anakubo kababawa alusna. 

Ngan hiji nu jadi pikiran teh. Harita aya babaturan anu ngahulag sangkan anak-anak kuring ulah moho kana Pokemon. Cek manehna, Pokemon teh singgetan tina pocket monster. Ari monster teh mahluk raksasa anu pikageuleuheun—malah bisa jadi pikasieuneun—katenjona. Sabisa-bisa mah eureunan lalajo pilem Pokemon teh. Barang-barang anu aya gambar Pokemon hadena ulah dikukut, cenah. Upama moho kana Pokemon, lambat laun bakal karasa mamalana. 

Cek babaturan, pocket monster teh gambaran tina kuasa gelap, nya eta kakuatan negatip. Cohagna mah Pokemon teh bisa disebutkeun setan bungkeuleukan. Apan setan teh sipatna negatip, mawa mamala, nyilakakeun. Ari pangna disebut bungkeuleukan apan sidik jirimna katingali mangrupa Pokemon—sok sanajan dina bentuk gambar. 

Salahsahiji mamalana tina pocket monster nya eta kasakit. Budak anu resep ulin jeung boneka Pokemon bakal jadi budak ririwit, gampang katarajang ku panyakit, umpamana keuna ku panyakit pilek anu hese cageurna sanajan geus bulak-balik ka dokter. Geuning sok katangen dina sapopoena, bari nyonyoo boneka Pokemon, budak teh ngan nongtot leho we tina irungna. Tah, eta teh tandaning, cek babaturan, geus keuna ku pangaruh kakuatan negatip tina pocket monster. Cohagna mah, eta boneka Pokemon geus katumpangan ku kakuatan negatip tea. 

Ku lobana jalma nu malaweung tug ka nyorang cilaka di jalan raya oge geus nyirikeun ayana kakuatan negatip tina pocket monster. Angot ku alatan moho kana Pokemon Go, barudak jadi teu ngawaro kana panggero ti nu jadi kolotna mah geus sidik mengparna tina papagon anu bener. Cindekna, peta barudak sarupa kitu, atawa balarea anu balangah di jalan raya tea, geus kasasar. 

Enya, pangna babaturan bisa nyarita kitu teh ku sabab manehna kaitung jalma anu ngarti kana perkara supranatural. Ngan narah disebutkeun ngaranna.

Ti saprak harita, barudak teh tara lalajo deui pilem Pokemon, da kabeneran TV-na ruksak. [] Endang GG