Ulah nepi ka Dulur Jadi Batur

Ngariung sadulur-dulur matak bungah karasana. | sundaonline.com

Lebaran teh waktu nu rahayu pikeun ngaraketkeun deui duduluran. Angot kasebutna jeung dulur pituin mah. Sanajan jeung batur oge, hade kasebutna upama nepi ka bisa duduluran. Enya, ganjor pisan bedana antara dulur jeung duduluran. Kitu cek Master Polarity Theraphi, Yohannes Steve Tauran, basa ngawangkong jeung sundaonline.com sawatara waktu kaliwat.

Steve netelakeun, dulur mah nya eta hubungan anu katalian ku nasab, kawas adi jeung lanceuk, emang jeung alo, jeung sajabana ti eta. Ari duduluran mah hubungan emosional papada jalma anu teu kasengker ku hubungan getih. Urang jeung batur bisa ngawangun hubungan duduluran. Sawangsulna, nu jadi dulur can tangtu bisa diajak duduluran.

Dina hubungan duduluran, geus pasti aya kabagjaan. Saestuna, cek Steve, papada dulur anu bisa ngawangun duduluran, lir sawarga anu mere mangpirang-pirang kani’matan. Upama batur bisa diajak duduluran, eta baris ngalahirkeun kabagjaan jeung kasugemaan. Upama batur teu bisa diajak duduluran, eta mah biasa, teu matak jaheut kana hate. Ngan, lamun nu kasebutna dulur teu bisa diajak duduluran, eta mah teu bina naraka kasebutna.

Dina hubungan duduluran nyangkaruk ayana welas asih. Ku sabab kitu, moal aya jalma anu katalangsara hirup dina kahirupanana seug manehna boga dulur jeung batur anu bisa dibawa duduluran. Ku ayana hubungan duduluran, dulur moal jadi batur, pon nyakitu batur teu bina ti dulur. Babasan dulur jadi batur moal kajadian upama katalian ku sipat duduluran. [] Siti Umayah