Jajanan Vegetarian

Surabi oncom salah sahiji jajanan vegetarian anu gampang diteangna. | sundaonline.com

Ti taun 1988 mula kuring jadi vegetarian. Taya masalah pikeun kuring mah. Upama diajak dahar ku babaturan anu lain vegetarian oge teu jadi soal. Kari waleh bae yen kuring mah vegetarian. Ku kituna babaturan oge surti. Ku surtina, basa Frank Hairgrove, babaturan kuring ti Amerika, ngajak dahar di imahna, manehna nyadiakeun kadaharan vegetarian. Basa ngayakeun acara sukuran oge manehna ngahaja mangnyieunkeun kueh bolu vegetarian. “This cake is eggless,” pokna netelakeun ka kuring yen eta kueh bolu teh teu make endog.

Pon nyakitu babaturan sejenna, kawas Ibu Lanny Suliman, warga Jalan Purnawarman Bandung anu katurunan Tionghoa, sok nyadiakeun kadaharan husus pikeun kuring anu vegetarian. Geus puguhning nu kasebut dulur atawa baraya mah. Saban ngumpul sadulur-dulur, dina lebah kadaharan kuring sarimbit mah sok disepesialkeun. “Ieu mah teu diendogan, teu didagingan, teu dihayaman, teu dilaukkan,” kitu biasana dulur-dulur nyarita ka kuring sarimbit upama keur botram. Sakali deui, ku cara kitu taya masalah.

Sanajan rumah makan vegetarian di Bandung kaitung langka, saenyana taya masalah pikeun vegetarian. Sabab tetela loba jajanan vegetarian teh. Bala-bala, gehu, comro, gorengan tempe, goreng pisang, tahu Sumedang, surabi, kulub jagong, beuleum jagong, cireng, cilok original, kueh lapis, nagasari, bongko, katimus, cakiak, jeung rea-rea deui, apan eta teh jajanan vegetarian. Sanajan nu daragangna can tangtu vegetarian. 

Jadi, upama nilik ka palebah dinya, kaitung loba jajanan vegetarian teh. Ku sabab kitu, upama aya niat rek jadi vegetarian, kari der bae teu kudu loba mikir, da jajananana mah geus nyampak. Angot Bandung kakoncara kulinerna. Sarebu hiji macem kadaharan di Bandung mah aya. Malahan mah, kaolahan jadul kayaning bandrek, bajigur, getuk, seupan hui, seupan sampeu, seupan cau, kulub suuk, jeung sabangsana, oge usum deui di Bandung mah. Matakna teu salah upama Bandung disebut kota kuliner.

Nu jadi masalah mah upama urang ngeukeuhan hayang kadaharan vegetarian anu rasana sarua jeung kadaharan hewani. Sanajan kaolahan nabati bisa “disulap” jadi kawas kaolahan hewani, prosesna kawilang renced—upama dijieun ku sorangan. Tapi ari loba duit mah teu jadi masalah deuih, da bahan-bahan pikeun kadaharan vegetarian geus nyampak di Bandung oge. Ngan masih kaitung langka tokona. Kuring oge ari balanja bahan-bahan sarupa kitu mah kudu indit jauh, ti Banjaran Kabupaten Bandung ka puseur Kota Bandung. Tapi da hal eta mah teu kaasup prinsip dina kahirupan vegetarian. Prinsipna dina kahirupan vegetarian mah henteu dahar sabangsaning kaolahan hewani. Peun semet kitu. Taya masalah. [] Rakhmat Margajaya