“Kamelang” Indra Tresna kana Seni Sunda

Indra Tresna | sundaonline.com

Anu mikaresep lagu-lagu pop Sunda moal bireuk deui kana laguna ”Kamelang” mah. Eta tea lagu anu digalindengkeun ku Nining Meida. Eta lagu katilu dina albeum “Kedah ka Saha” teh kungsi booming dina taun 1992. Ketang, tug ka kiwari oge, masih sok aya radio anu midangkeun eta lagu. Apal ka nu ngarangna? Nu ngarangna teh Indra Tresna (56). Alhamdulillah, Senen, 15 Agustus 2016, sundaonline.com diparengkeun paamprok jonghok sareng Kang Indra di bumina, Jalan H. Sapari Bandung. 

Sanajan kasebutna musisi senior, Kang Indra mah handap asor. Barang gok, sundaonline.com dibageakeun ku romanna anu marahmay. “Mangga calik,” saurna basa sundaonline.com nyoloyong kana sofa anu ngajagrag di terasna. Derekdek, eta seniman Sunda anu geus ngarang lagu leuwih ti 100 teh ngudar pangalamanana.

Indra Tresna geus tibelat kana seni musik ti keur rumaja keneh. Mimiti ancrub kana rekaman mah taun 1990. Aya kana 80 laguna anu medal. Sesana, 20 lagu, teu kaburu medal, da ti taun 2014 mah bingung cenah rek ngajual lagu-lagu Sunda teh. Naha? “Sumuhun da teu aya produserna,” cek eta carogena Teh Vonny. 

Kiwari produser geus wegaheun ngarilis lagu-lagu Sunda teh. Sabab, teu nguntungkeun. Upama dipaksakeun kalah ka nguntungkeun pembajak. Ari minat masarakat kana lagu-lagu Sunda mah teu ngurangan. “Ayeuna mah, hoyong lagu naon wae oge kantun nga-download dina youtube,” pokna deui ngajentrekeun.

Ku kituna, cek eta bapa dua anak anu kakara boga hiji incu teh, lain musisi Sunda wae anu pikasediheun teh. Meh sakabeh musisi di Indonesia mah keur nandangan lara. Duka kudu kumaha ngungkulan eta pembajak. Tarekah mah asa geus beak dengkak. Sam Bimbo saparakanca oge, ngaliwatan Paguyuban Seni Sunda, geus kurang kumaha ngungkulan para pembajak teh. Ti jaman Susno Duaji jadi Kapolda, para seniman Sunda geus nyoba ngeundeuk-ngeundeuk pembajak, tapi da geuning hese. Tug ka wangkid ieu para pembajak angger mahabu. 

Ku wegahna produser medalkeun lagu-lagu anyar, tong aneh seug lagu-lagu Sunda anu dipidangkeun dina radio atawa televisi teh lagu-lagu lawas kayaning “Kamelang”-na Indra Tresna. [] ram