Nu Ngarep-ngarep Kamerdikaan

Pikeun Dede Saepudin, agustusan teh waktuna mupu piuntungeun tina ladang jualan bandera. 
| sundaonline.com

Wanci lohor, Senen, 15 Agustus 2016, Dede Saepudin (45) kasampak keur cunggelik sorangan tukangeun bandera anu rantuy di sisi Jalan Soekarno-Hatta Bandung. Eta urang Kampung Sumur, Desa Cangkuang, Kacamatan Leles, Kabupaten Garut teh, keur dagang bandera. Geus biasa pikeun Dede mah, tiap tanggal 1-16 Agustus mah waktuna dagang bandera, umbul-umbul, background garuda jeung background karet di eta tenpat matuhna. “Ti taun dua rebu,” pokna basa ditanya ku sundaonline.com iraha ngamimitianana. 

Dede anu nagog di eta tempat ti tabuh dalapan isuk-isuk nepi ka wanci magrib ngajentrekeun, omset dagang bandera taun ieu teu beda ti taun kamari, nya eta tibah cukup jang ka dapur. “Langki nu maleserna ayeuna mah,” Dede netelakeun. Tanggal hiji ukur meunang Rp 50 rebu. Tanggal dua mah enol alias teu beubeunangan. Tanggal tilu payu bandera hiji Rp 25 rebu. Tanggal opat nepi ka tanggal salapan meunang Rp 50 rebu saban poena. Tanggal sapuluh meunang Rp 100 rebu. Tanggal sabelas jeung dua beulas meunang Rp 200 rebu. Tanggal tilu belas Rp 300 rebu. Tanggal opat belas Rp 350 rebu. Tanggal 15 Rp 400 rebu. “Upami kaping 16 mah biasana tiiseun,” pokna deui ngajentrekeun. 

Hadena bandera anu dijual ku Dede mah buatan sorangan, nya eta buatan Yuyun Yuningsih (36), pamajikanana anu sapopoena jadi tukang ngaput nyieunan kolor di lemburna. Yuyun mimiti tatahar nyieunan bandera, umbul-umbul, background garuda jeung background karet teh ti keur bulan puasa keneh. Lumayan modalna oge nepi ka Rp 5 jutaan. Upama payu kabeh piduiteunana bakal jadi Rp 10 jutaan. Tapi, cek Dede, ayeuna oge modal mah geus balik. Lian ti dijual ku sorangan, bandera buatan Yuyun teh dijual ku batur (retailer) di Jalan Garuda Bandung, Pasar Gordon Bandung, Banten jeung NTB. Ku kituna, dina nyesana oge tara loba. 

Dede ngajual bandera hijina Rp 20 rebu–Rp 25 rebu, umbul-umbul Rp 15 rebu–Rp 20 rebu, background garuda Rp 150 rebu jeung background karet Rp 100 rebu. 

Tiiseunana dagang bandera dina mapag milangkalana kamerdikaan Republik Indonesia anu ka-71, cek Dede, lain ku lantaran nyirorotna rasa patriotisme, tapi bisa jadi ku sabab bandera taun nu kamari araya keneh. “Da apan ieu bandera, umbul-umbul sareng background teh tiasa kanggo opat kalieun HUT RI,” pokna ngeceskeun. 

Salila dagang bandera di Jalan Soekarno-Hatta Bandung, Dede nyewa tempat sakamar Rp 3oo rebu sabulan, di Cijagra. Sarengsena dagang bandera, Dede anu ngabogaan anak tilu teh balik deui kana pagawean matuhnya, nya eta milu di proyek jadi tukang bangunan.

Utamana pikeun Dede sarimbit, umumna pikeun warga masarakat Kacamatan Leles, Kabupaten Garut, tanggal 17 Agustus ngandung harti anu mandiri. Rek teu kitu kumaha, da ari mapag agustusan teh warga masarakat di eta lembur obyag usahana nyarieunan bandera, umbul-umbul jeung sabangsana. Hebatna, eta bubuatan urang Leles Garut teh nyebar ka sakuliah Indonesia. “Bandera buatan Leles mah ka Papua oge dugi. Apan bandera buatan pun bojo oge dugi ka NTB,” Dede netelakeun kalayan reueus. 

Ku kituna, poean kamerdikaan teh kalintang diarep-arepna ku urang Leles Garut mah. “Upami tiasa mah 17 Agustus teh saban dinten,” cek Dede bari ngaheheh. [] ram