Revolusi Mental Bangun nu Asa-asa

Dina revolusi mental, hadena tulisan dina eta tabung gas dipupus.| sundaonline.com

Bangsa urang geus mo bireuk deui kana babasan “revolusi mental”. Sabab, eta babasan geus diwanohkeun ti jamanna Jokowi nyalon jadi presiden. Ngan, anehna, eta babasan karasana jeung katarana can napak. Tong boroning di tingkat kaom masakat, dalah di tingkat para pajabat oge teu atra katarana. Nembongkeun buktina mah gampang. Geura jung ka dapur atawa ka warung. Tempo tabung gas tilu kilogram anu kelirna hejo tea. Dina eta tabung aya bacaan anu unina “HANYA UNTUK MASYARAKAT MISKIN”. Punten eta bacaan teh ditulisna ku hurup gede kabeh. Sanes teu sopan, da kitu ditulisna dina tabung gasna.

Ku ngajeblagna eta tulisan, atra pisan yen pangkat pajabat oge can bisa nembongkeun ayana revolusi mental. Hartina, upama enyaan ayana revolusi mental, tulisan samodel dina eta tabung gas geus moal aya. Sabab, eta tulisan tojaiah jeung prinsip revolusi mental. 

Cek para ahli kakuatan pikiran (The Power of Mind), revolusi mental pohara pentingna. Alus henteuna kaayaan hiji jalma ditangtukeun ku kaayaan mentalna. Mentalitas anu goreng baris ngahasilkeun kahirupan anu goreng. Ahli filsafat ti Cina, Lao Tze netelakeun yen urang teh bakal kawas nu ku urang dipikiran, ari pikiran urang bakal kawas nu didahar ku urang. Ku sabab kitu, Lao Tze anu sapopoena jadi vegetarian peupeujeuh sangkan urang tarapti dina pipikiran. Kudu ngabiasakeun mikir positip, ulah mikiran hal-hal anu negatip. Upama urang mikirna positip, tangtu laku lampahna oge bakal positip. Ku mikir jeung milampah hal anu positip, hasilna oge bakal positip. Cek Dale Carnagie mah urang teh kudu berpikir dan berjiwa besar sangkan bisa ngahontal hal-hal anu gede.

Balik deui kana tulisan dina tabung gas tea. Eta geus netelakeun hengkerna mentalitas bangsa urang. Ku ayana eta tulisan, pamarentah teu bina ti ngukut kamiskinan rahayatna. Pon nyakitu, rahayat miskin anu agul ku kamiskinanana moal bisa menyat kaayaanana. Angot jalma jegud anu ngaku-ngaku miskin ngarah meunang SKTM, raskin, askeskin, jeung samodelna mah. 

Lamun pamarentah enyaan rek ngawujudkeun revolusi mental, hadena “atribut miskin” dina saniskara program kamasarakatan teh dieuweuhkeun. [] Endang GG